Agon Sadiku bën hapin e madh, i bashkohet gjigantit norvegjez

Sulmuesi me prejardhje kosovare Agon Sadiku, ka kompletuar kalimin te Rosenborg nga skuadra e Honkas.

Sadiku që luajti te kombëtarja e Kosovës për ndeshjet e muajit nëntor ka nënshkruar kontratë pesëvjeçare te gjiganti norvegjez.

Ishte vetë skuadra finlandeze që me anë të një komunikate konfirmoi se Sadiku ka bërë lëvizjen e madhe.

"Agon Sadiku kalon te Rosenborg. Në moshën 19-vjeçare, Sadiku shënoi 14 gola në ligë që ndikuan të jetë i treti në ligë", shkroi klubi në komunikatë.

Sadiku gjithashtu ka falënderuar Honkan për këto vite bashkëpunimi.

"Faleminderit shumë Honkas për këto sezonet e kaluara. Faleminderit të gjithë mbështetësve dhe stafit, sidomos trajnerëve dhe bashkëlojtarëve që për një kohë të shkurtër u bënë si një familje e madhe për mua. Jam shumë falënderues. Faleminderit që ishin pjesë e kësaj skuadre të mrekullueshme që më mësuan shumë. Udhëtimi im tani do të vazhdoj diku tjetër, por Honka do të jetë në zemrën time", deklaroi ai për uebsajtin e klubit.

Në anën tjetër, Rosenborg e ka mikpritur Sadikun, i cili ka nënshkruar kontratë për pesë vitet e ardhshme.

"Mirë se vjen Agon. Sulmuesi finlandez Agon Sadiku është gati për Rosenberg dhe ka nënshkruar kontratë deri në vitin 2027".