Cufaj: E kemi Draft Marrëveshjen Kosovë- Serbi, të ulemi, ta diskutojmë dhe ta përfundojmë
Ish-ambasadori i Kosovës në Gjermani, Beq Cufaj ka paralajmëruar se java e ardhshme do të jetë shumë e rëndësishme për Kosovën.
Sipas tij të enjten që vjen, me 3 Nëntor, në kuadër të Procesit të Berlinit do të formalizohen 3 marrëveshje të rëndësishme për qytetarët e 6 shteteve të Ballkanit Perëndimor.
“Liria e lëvizjes, njohja e diplomave universitare dhe hapja në treg për bizneset e këtyre vendeve do të shënojnë një kapitull të ri dhe tepër të rëndësishëm në të ardhmen”, ka shkruar Cufaj.
“Të enjten që vjen në Berlin pokështu prapa kulisave, në tavolinat e udhëheqësve të Kosovës dhe Serbisë do hidhen zaret. Numërimi i orëve dhe ditëve do të jenë më ndryshe prej pas vendimit të djeshëm të Kryeministrit Kurti”, thotë ai.
Ai ka deklaruar poashtu se “reagimi i Ëashingtonit zyrtar për gjetjet eufemike të Kryeministrit Kurti dje, nuk duhet të çudisë. Sepse ajo që Kryeministri ka vendosur quhet: limit kohor. Limit kohor i cili përmes përshkallëzimit të vendimit për targat shton presionin mbi Beogradin. Por edhe negociatorët ndërkombëtarë në Washington, Paris, Berlin, Londër”.
Tutje ai është shprehur se Draft Marrëveshja Kosovë-Serbi duhet të përfundohet.
“E kemi Draft Marrëveshjen Kosovë- Serbi, të ulemi, ta diskutojmë dhe ta përfundojmë. Ky është mesazhi i djeshëm nga Prishtina zyrtare- drejtuar Beogradit por edhe kancelarive perëndimore. Beogradit nuk po i ngutet. Prishtinës po. Ndërkombëtarëve po, por jo edhe aq sa ta mbështesin Vuçiqin për muri! Kosova duhet të jetë e urtë. Prandaj këto ditë na duhet unitet dhe jo përçarje, pjekuri dhe jo politikë për nevoja të brendshme”, thotë ai.
