Investitori premton t'i investojë në çimentoren e Klinës 200 milion euro, në llogari i ka vetëm 1000 euro
Mbi dy mijë banorë të Dollcit protestuan kundër ndërtimit të një fabrike të çimentos në fshatin e tyre. Janë mbledhur afër 5 mijë nënshkrime në peticionin me të njëjtin kundërshtim. Banorët e shohin fabrikën si kërcënim të shëndetit e shkatërruese të ambientit.
“Duam plantacion të vishnjeve, e jo kancerin,” – thoshte një parullë e protestës, e që lidhej me plantacionin e dikurshëm të këtij rajoni.
Të shurdhër ndaj kërkesave të banorëve ishin komunarët e Klinës dhe tri ministri përkatëse.
Autoritetet lokale e qëndrore veçse kanë lëshuar lejet e para (disa leje), ndër vite, për kompaninë Wallingford International Kosovo L.L.C për shfrytëzimin e kodrinave të fshatit (pronë publike) për ndërtimin e fabrikës së çimentos në vlerë multimilionshe.
Nuk dihet saktë se sa do të investojë kompania Wallingford International Kosovo L.L.C, apo se kur do përfundonte ndërtimi, mirëpo kanë qarkulluar disa shifra multimilionshe, duke nisur prej 90 milion euro e duke u përmendur edhe shifra 220 milion euro si investim.
Mirëpo, çka bie në sy është se kompania Wallingford International Kosovo L.L.C tek Agjencia e Regjistrimit të Bizneseve Kosovës (ARBK) kompania nuk ka as për së afërmi shumën e pretenduar për investimin multimilionësh.
Gazeta Nacionale ka gjetur se kompania Wallingford International Kosovo L.L.C ka vetëm 1 mijë euro të deklaruar si kapital themeltar. Kompania nën pronësi të Atdhe Kollçakut, me 100 për qind të aksioneve, për më tepër e ka të regjistruar vetëm një punëtor.
Kompania Wallingford International Kosovo L.L.C është regjistruar për herë të parë në vitin 2012 në Prishtinë si ‘‘Shoqëri me përgjegjësi të kufizuar’’. Ani pse me një punëtor të deklaruar, kompania në faqen e ARBK-së i përshkruan vetes 22 aktivitete ekonomike.
Duke nisur nga restorantet dhe aktivitetet të shërbimit të udhqimit, pastaj tek instalimet elektrike, tek tregtia me shumicë e pjesëve elektrike e hidraulike, e deri tek nxjerrja e mineraleve kimike dhe plehërave kimikë, pastaj nxjerrja e zhavorit, rërës, argjilës dhe kaolinit.
Kompania ka përfituar disa leje që i mundësojnë nisjen e ndërtimit të fabrikës së çimentos në Dollc të Klinës.
Kuvendi Komunal i Klinës ka votuar për të tërhequr lejet e lëshuara për kompaninë, mirëpo së fundmi Komuna e Klinës ka lëshuar leje të ndërtimit për kompaninë në fjalë, ani pse vendimi është kundërshtuar e po kundërshtohet nga banorët. Komuna është arsyetuar se vendimit të saj i kanë parapri vendimet e disa ministrive.
Ministria e Mjedisit, Planifikimit Hapësinor, mars 2021, i ka lëshuar leje të pëlqimit mjedisor, ndërkaq paraprakisht Ministria e Bujqësisë kishte bërë ridestinimin të truallit nga tokë bujqësore në tokë minerare.
Sipas banorëve të Klinës, një prej qyteteve me ajrin më të pastër në Kosovë, në atë vend kishte ekzistuar dikur një plantacion vishnjesh prej më të mëdhave në Ballkan, dhe insitojnë se atje duhet të investohet në plantacione.
