Von der Leyen: Migrimi është një sfidë evropiane që kërkon një përgjigje evropiane

Sot, në një diskutim me përfaqësuesin e Presidencës suedeze të Këshillit të BE-së dhe Presidentin e Komisionit Von der Leyen, eurodeputetët kërkuan ndryshime konkrete në politikën e migracionit të BE-së pas shumë vitesh diskutimesh.

Çështja e azilit dhe migrimit do të jetë një nga dy temat në samitin e jashtëzakonshëm të liderëve të BE-së më 9 dhe 10 shkurt në Bruksel.

Ministri suedez njoftoi se në Këshillin e jashtëzakonshëm Evropian javën e ardhshme, liderët e BE-së do të shqyrtojnë çështjet e migracionit, si dhe situatën në Ukrainë, programin ekonomik dhe planin industrial evropian.

Kur bëhet fjalë për migracionin, fokusi do të jetë në kontrollin e kufijve të jashtëm, bashkëpunimin me vendet e treta dhe kthimin më efektiv të migrantëve dhe azilkërkuesve pa të drejtë qëndrimi në BE në vendet e tyre të origjinës apo tranzitit. Gjithashtu pritet që Këshilli Evropian të bëjë thirrje për vazhdimin e punës legjislative për Paktin e Azilit dhe Migracionit.

Von der Leyen: Prioriteti është zgjidhja e shkaqeve të migrimit nga vendet e treta

Presidentja e Komisionit Ursula von der Leyen vuri në dukje se migrimi është një sfidë evropiane që kërkon një përgjigje evropiane. Sipas saj, puna legjislative duhet të vazhdojë me synimin për të lidhur një pakt deri në pranverën e vitit 2024, duke zhvilluar veprime shtesë për forcimin e kufijve të jashtëm dhe për të siguruar një kthim më të shpejtë dhe dinjitoz të migrantëve në vendet e tyre të origjinës ose tranzitit. Përmirësimi i solidaritetit vullnetar, adresimi i shkaqeve rrënjësore të migrimit nga vendet e treta dhe futja e rrugëve të sigurta dhe ligjore për në Evropë duhet të jenë gjithashtu prioritete të BE-së, tha ajo.

Ndër të tjera, deputetët kërkuan mbrojtje më efektive të kufijve, duke përfshirë vendosjen e gardheve.

Një pjesë e përfaqësuesve të klubeve të majta këmbëngulën se politika e migracionit e BE-së, për të qenë e besueshme, duhet të respektojë të drejtat e njeriut dhe të kombinojë përgjegjësinë dhe solidaritetin ndaj refugjatëve. Duke vënë në dukje se plakja e popullsisë në Evropë e bën të nevojshëm migrimin për motive punësimi, disa anëtarë të Parlamentit Evropian mbrojtën hapjen e rrugëve ligjore për në BE. /Nacionale/