Vizita e Kos në Kosovë, pas takimeve me Kurtin e Haxhiun kërkoi stabilitet institucional
Komisionerja evropiane për Zgjerim, Marta Kos, zhvilloi këto ditë vizitën e saj të parë në Kosovë që nga marrja e kësaj detyre.
Gjatë qëndrimit në Kosovë, Kos u takua me ushtruesen e detyrës së presidentes, Albulena Haxhiu, dhe me kryeministrin në detyrë, Albin Kurti. Të dyve u kërkoi stabilitet institucional.
Pas takimit me Kurtin, Kos tha se viti 2026 mund të jetë një moment i mundësive evropiane për Kosovën.
“Ishte kënaqësi të jem sot në Prishtinë dhe të takohem me kryeministrin në detyrë Albin Kurti. Faleminderit për mikpritjen e ngrohtë. 88% e qytetarëve të Kosovës besojnë në perspektivën evropiane të vendit. Ne jemi të gatshëm t’i përgjigjemi thirrjes së tyre për të intensifikuar nivelin e punës në çështjet ekonomike, në përparimin demokratik dhe në reforma. Viti 2026 mund të jetë një moment i mundësive evropiane për Kosovën. Kjo kërkon që forcat politike të bashkohen dhe të gjejnë stabilitet institucional afatgjatë”, ka shkruar ajo.
Pleased to be in Pristina today and meeting caretaker Prime Minister @albinkurti. Thank you for the warm welcome.
— Marta Kos (@MartaKosEU) May 15, 2026
88% of Kosovo’s people believe in the country’s European perspective. We are ready to answer their call to intensify the level of work on economic issues, on… pic.twitter.com/kqTUSDZ6zt
Ndërkohë, Kurti në një njoftim tha se ka kërkuar avancimin e procesit të anëtarësimit të Kosovës në BE.
“Kanë kaluar mbi 40 muaj që nga aplikimi i Kosovës dhe momenti i ripërtërirë i zgjerimit nga ana e BE-së duhet të rezultojë me avancimin e merituar të Kosovës”, tha kryeministri në detyrë, duke shtuar se Kosova nuk kërkon rrugë të shkurtër e as derë të pasme, por vetëm një proces të bazuar në merita dhe trajtim të barabartë.
“Gjetja e unitetit brenda BE-së për të marrë vendime ndaj Kosovës është detyrë e përbashkët e institucioneve të BE-së dhe e shteteve anëtare”, thuhej në një njoftim të zyrës së tij.
Stabilitetin institucional, Kos e përmendi edhe gjatë takimit me Haxhiun.
“Isha e lumtur të takohem sot në Prishtinë me presidenten në detyrë Albulena Haxhiu dhe ta falënderoj për pritjen e përzemërt. Më gëzon përkushtimi i saj ndaj rrugës evropiane të Kosovës. Shpresojmë të rikthehemi në një nivel më të lartë bashkëpunimi për çështjet e integrimit evropian, reformave dhe rritjes ekonomike. Pres me padurim të rikthehem në Kosovë sapo të gjendet sërish stabiliteti i plotë institucional”, deklaroi ajo.
I was happy to meet acting President @albulenahaxhiu_ in Pristina today and thank her for the fond welcome.
— Marta Kos (@MartaKosEU) May 15, 2026
I am glad of her commitment to Kosovo’s European path. We hope to return to a higher level of cooperation on the issues of European integration, reforms, and economic… pic.twitter.com/EKYCfPlx9I
Komisionerja evropiane për Zgjerim ishte paraparë ta vizitonte Kosovën në mars të këtij viti.
Megjithatë, siç ishte konfirmuar më herët, Kos e kishte shtyrë vizitën për shkak të zhvillimeve politike në vend.
