Veç shtëpia gati një milion euro: Pasuria përrallore e Luan Dalipit, shefit të kabinetit të Kurtit
Gazeta Nacionale pak më parë ka publikuar një abuzim të radhës të pushtetit të Lëvizjes Vetëvendosje. Gazetari Berat Buzhala ka treguar se si kompania e vëllait të Luan Dalipit, shefit të Kabinetit të kryeministrit Albin Kurti, ka fituar një tender prej 67 mijë eurosh nga Agjencia e Privatizimit të Kosovës.
Por cila është pasuria e Luan Dalipit, që është dora e djathtë e Kurtit?
Sipas formularit të dorëzuar në Agjencinë Kundër Korrupsionit, Luan Dalipi është goxha i pasur. Në fakt, ai është milioner.
Veç një shtëpi që shefi i stafit të kryeministrit e ka në pronësi të përbashkët, kushton gati një million euro, pra rreth 950 mijë euro.
Ai kishte deklaruar se e ka edhe një banesë që kushton 110 mijë euro, një depo që kap vlerën e gjashtë mijë euro dhe një garazh e cila i kushton tre mijë e 200 euro.
Dalipi e posedon edhe një veturë të tipit Mercedes Benz e cila kushton 35 mijë euro. Po ashtu, ka deklaruar edhe një veturë tjetër për të cilën thotë se është në pronësi të bashkëshortes, dhe e cila kushton mbi tetë mijë euro.
Po ashtu, rreth gjashtë mijë e 300 euro, Dalipi i mban si para të gatshme në një bankë në Kosovë. Ndërkohë, bashkëshortja e tij ka kursime rreth 57 mijë euro.
Në fund, Dalipi ka treguar se ka marrë rreth dy mijë e 600 euro meditje për një udhëtim në Shtetet e Bashkuara të Amerikës. Ai po ashtu, ka deklaruar si të hyra vjetore nga puna e tij në Zyrën e Kryeministrit rreth 15 mijë euro.
Bashkëshortja e tij, ka marrë pagë vjetore fillimisht 18 mijë euro në një klinikë, më pas në disa të tjera rreth 24 mijë euro.
