Thellohet edhe më tej “çarja e madhe” mes Kurtit dhe KFOR’it: Çka (nuk) po thonë?
Që nga mëngjesi e tërë ditën ka kërkuar me ngulm nga KFOR’i të reagojnë – dhe atë “urgjentisht”. S'bën të heshtet e as të tregohet përulësi, tha Kryeministri i Kosovës, Albin Kurti, duke iu drejtuar KFOR’it nga foltorja e Kuvendit të Kosovës; e në veçanti jo ndaj “një sulmi kidnapues, të cilin e kishte edhe mandat ta parandalonte”. Ishte hera e parë që Kurti – kaherë kërkonte prani më të madhe forcash ndërkombëtare në vend – e kishte marrë në emër të përvetshëm misionin paqeruajtës të NATO’s për llogaridhënie. Janë bërë 30 orë e KFOR’i asgjë, tha ai t’ju ketë “protestuar” ambasadorëve të QUINT’it.
“Nëse KFOR-i e shndërron këtë heshtje në normë, e njëfarë nënshtrimi të heshtur në ligj, që dihet publikisht, atëherë një gjë të tillë le të na e thotë hapur, dhe ashtu do ta mohojë një përgjegjësi ndërkombëtare, që ishte dashur ta përmbushë efektivisht”, tha ai.
KFOR’i megjithatë u përgjigj, duke mos u përgjigjur.
Por në (mos)përgjigjen e KFOR’it, kishte edhe gjëra që mund të lexoheshin si përgjigje implicite.
Nuk i referohej si “kidnapim” ose “rrëmbim” por vetëm si arrestim.
Por, as edhe një gjë tejet kyçe – nuk thanë që ky arrestim ndodhi as në territor të Kosovës e as në të Serbisë. Këtë pjesë e kaluan heshtazi.
Tjetra gjë që s’e thanë, ishte që ato ishin pjesë e njësive speciale ushtarake “Kobra”. Thanë thjesht Polici e Serbisë.
Në një përgjigje për Nacionalen, KFOR-i përgjigjet kështu; thënë përmbledhtazi: Nuk ishim aty.
“Misioni i udhëhequr nga NATO, KFOR’i, nuk ishte në atë zonë kur tre pjesëtarë të Policisë së Kosovës u arrestuan nga Policia e Serbisë”, tha KFOR’i.
“KFOR-i ka dërguar një ekip në zonë dhe ka vendosur kontakte me përfaqësuesit e institucioneve në Kosovë dhe të autoriteteve serbe. KFOR-i është gjithashtu në kontakt të rregullt me misionin e udhëhequr nga BE-ja për Sundimin e Ligjit, EULEX”.
Kryeministri Kurti sot i mëshoi toneve denoncuese ndaj Serbisë për “akt agresioni qyqar dhe tinëzar” për rrëmbimin e tre policëve kufitarë, ndërsa tregoi se në takim me ambasadorët e QUINT’it pati shumëçka për t’ju protestuar. E në veçanti, shtroi pyetjen, çfarë po bënte KFOR’i?
“Akti i këtillë i kësaj policie militare të Serbisë, është në variantin më të mirë, një akt qyqar, e cila pasi kidnapoi tre policë, që kishin mandat të qartë në mbrojtjen e kufirit nga grupet që kontrabandonin mallra përmes rrugëve ilegale, iku me shpejtësi nga vendi i ngjarjes”.
Çarja e madhe mes KFOR’it dhe Kurtit
S’i ka as dy javë kur KFOR’i do të kishte mprehur gjithashtu tonet ndaj kryeministrit kosovar, Albin Kurtit – dhe atë në emër të përvetshëm.
“KFOR’i nuk është çadër për t’u strehuar pas veprimeve të njëanshme”. Kështu iu drejtua Kryeministrit të Kosovës, Albin Kurtit, komandanti i Misionit Paqeruajtës të NATO’s në Kosovë, Gjeneral Majori italian, Angelo Michele Ristuccia kohëve të fundit duke folur për gazetën italiane “Corriere”.
Në intervistën e tij të dytë brenda tri ditëve dhe pas plagosjes së rreth 30 ushtarëve të KFOR'it (11 prej tyre italianë) në Zveçan të hënën, Ristuccia i kishte mprehur tonet.
Ditë më parë, Ristuccia i tha gazetës italiane “la Repubblica” diçka tejet të frikshme për nga tingëllima: se po të mos ishte për intervenimin e KFOR’it, “do të ishim duke mbajtur zi për të vdekur”.
Këtu ai kishte ndërmend viktima të mundshme nga Njësitet Speciale të Kosovës dhe protuestuesve sulmues barbarë.
Tashmë Ristuccia nuk do t’i kursente fjalët dhe do të lëshohej në vlerësime politike për të identifikuar kush-është-fajtor-për-çka.
“Që nga 2021 vetëm hapa mbrapsht”, tha ai, derisa vlerësoi se janë bërë përpjekje të mëdha njëzet vjeçare për të arritur “rezultate të rëndësishme”. Këtu komandanti e pranoi se nuk është punë e tij të bëjë vlerësime politike, por se në këso rastesh ku prodhohen pasoja s’ka se si të mos bëjë konstatime të tilla.
Të hënën, tha Rusticcia, “shmangëm një tragjedi”.
Shpjegimi i tij ishte kësisoji se pse erdhën siç erdhën gjërat: për shkak të vendimit “të dytë të njëanshëm” të qeverisë kosovare “për të përdorur forcën pa u konsultuar me ne”.
Fjalia e tij do të zhveshej nga ato të zakonshmeve të KFOR’it.
Tash ai do t’u binte toneve që pasqyrojnë dritën reale të gjendjes në terren: “Për të qenë edhe më i saktë, them se nëse sot nuk jemi këtu për të mbajtur zi për të vdekurit në mesin e popullatës serbe apo në mesin e policëve shqiptarë etnikë, kjo është për shkak se KFOR-i ndërhyri dhe arriti të rivendosë qetësinë”.
Komandanti i KFOR’it, kishte fajësuar dhe tërhequr vërejtjen të dyja palëve me një kërkesë: Merrni përgjegjësi, mos u fshini para narrativave të rremë. Ishte e padëgjuar më parë që një udhëheqës i forcës paqeruajtëse të jepte konstatime të kësaj natyre.
Në nëntor të vitit të kaluar, edhe ish-Komandanti hungarez i KFOR’it kishte dhënë disa detaje të një krize tjetër në veri asokohe, për çka pati treguar se si i kishte bërë thirrje kryeministrit kosovar, që asokohe të shihej të operohej konsensualisht. Kurti ia kishte kthyer prerazi se “unë nuk negocioj me kriminelë”.
“Qëllimi ka qenë të formojnë njëfarë konsensusi, pasi që edhe serbët e Kosovës kanë interes të eliminojnë grupet aktuale kriminale. Qëndrimi i Qeverisë së Kosovës, sidoqoftë, ishte se ne nuk negociojmë me kriminelë dhe se policia kryen operacionet e saj ashtu siç u shkojnë për shtati”, pati treguar Ferenc Kajari për median hungareze “Honvedelem”.
Këtu, edhe Ristuccia do të tregonte saktësisht për “kokëfortësinë” e kohëve të fundit, sipas tij, të treguar nga qeveria kosovare.
“Kokëfortësia e autoriteteve vendore shqiptare për të mos vepruar sipas indikacioneve të marra nga partnerët perëndimorë, indikacione që shërbejnë për të lehtësuar dialogun veçanërisht në dritën e progresit të bërë me marrëveshjet në Bruksel dhe Ohër, ka dobësuar shumë ekuilibrin”, i tha ai ditë më parë gazetës italiane “la Repubblica”.
Njëjtë do të shprehej edhe në intervistën e tij të fundit të dhënë mbrëmjen e së shtunës. “Veprimi i dytë i njëanshëm i qeverisë së Prishtinës ishte përdorimi i forcës pa u konsultuar me ne, duke bërë kështu të nevojshme ndërhyrjen tonë për të shmangur një tragjedi”.
Kurti, i cili asobote opozitare shprehej nga foltorja e Kuvendit të Kosovës se “KFOR’i mbron Rezolutën 12/44” dhe se “KFOR’i nuk mbron pavarësinë e Kosovës” dhe se “kufjtë i Kosovës i sheh si vijë administrative e jo si kufij ndërshterorë”, megjithatë, tash në çdo paraqitje të tij kërkon nga NATO që të dislokojë më shumë trupa në Kosovë brenda kësaj Rezolute 12/44, rezolutë kjo e vitit 1999 që ende e ka të shkruar Kosovën si “pjesë integrale të Republkës Federale të Jugosllavisë” dhe e cila rezolutë nuk është zhbërë asnjëherë, për shkak të vetos ruse dhe kineze, dy shtete këto anëtare të përhershme të Këshillit të Sigurmit të OKB-së.
Kurti, do të kërkonte më shumë e më shumë forca, në veçanti gjermane. Kjo dëshirë do t’i plotësohej pas krizës që ngjau në veri, për shkak të vendimit të tij solo e pa mbështetjen e asnjë aleati, e në veçanti të aleatit dhe hisedarin më të madh të sigurisë në Kosovë, Shtetet e Bashkuara të Amerikës së Kosovës. Sekretari Gjeneral i NATO’s, Jens Stoltenberg, do të lajmëronte për nisjen e 700 trupave shtesë të NATO’s në Kosovë. Kurti këtë do ta mirëpriste.
Por, çka s’do të mirëpritej nga Kurti, e shpjegon shefi i këtij misioni paqeruajtës. “KFOR’i nuk është çadër për t’u strehuar nga veprimet e njëanshme”.
“Asgjë nuk ka ndryshuar për ne dhe asgjë nuk ka ndryshuar pas përplasjeve të 29 majit. Mandati i rezolutës 1244 të Këshillit të Sigurimit të OKB-së mbetet i pandryshuar. Dhe ne jemi gati për çdo rast”, do të shtonte Ristuccia./Nacionale/
