Taktika manipulative e ministrit Murati për "rënien e theksuar të çmimve"
Në një postim të fundit në Facebook, Ministri i Financave, Hekuran Murati, ka njoftuar se shkalla e inflacionit për muajin prill ka shënuar një rënie të theksuar në raport me muajt e mëparshëm. Duke iu referuar të dhënave të ASK-së, Murati – në përputhje me logjikën e liderit të tij, kryeministrit Kurti – përdrodhi të dhënat duke relativizuar në kohë krahasimin për të arritur në përfundimin e dëshiruar. Por ku qëndron saktësisht problemi me postimin e Muratit?
Lufta e Rusisë në Ukrainë komplikoi më tej efektet e pandemisë duke rritur çmimet e mallrave në Evropë dhe në mënyrë të pashmangshme brenda vendit. Përgjatë vitit 2022, Kosova përjetoi një nivel të paprecedentë të inflacionit, me çmimet e produkteve që arritën kulmin në korrik, 14.2 për qind. Si rezultat, qeveria u përball me kritika të vazhdueshme nga opozita për mungesë veprimi.
Në shkrimin e ministrit Murati se çmimet kanë shënuar rënie, krahasimi u bë me “disa muaj më parë”. "Shkalla e inflacionit për muajin prill sipas ASK-së ishte 6.3%, që paraqet një rënie të theksuar krahasuar me nivelin që kishim disa muaj më parë."
Ministri i Financave evitoi krahasimin e indeksit me muajin paraprak apo muajin e njëjtë të vitit paraprak. Kjo për shkak se krahasuar me muajin mars, indeksi i çmimeve të konsumit ishte në fakt më i lartë për 0.3 pikë përqindje. Ndërsa norma vjetore e inflacionit e matur në muajin prill 2023 me muajin e njëjtë të vitit paraprak ishte 6.3 për qind më e lartë.
Mungesa e bashkëpunimit
Çmimet e energjisë, ushqimeve dhe metaleve, etj, përjetuan rritje eksponenicale përgjatë asaj kohe. Politikat ekonomike të Qeverisë që kryesisht fokusoheshin në disa pako sociale rezultuan të dështuara bazuar në konkluzionet e një raporti të Bankës Botërore të asaj kohe. Në anën tjetër, propozimet e masave kundërinflacioniste të opozitës po injoroheshin vazhdimisht nga shumica parlamentare në Kuvendin e Kosovës.
Mungesa e bashkëpunimit të pushtetit me opozitën për hartimin e politikave ekonomike të nevojshme, në një kohë kur qytetarët ballafaqoheshin me çmime të larta, u kthye kundër qeverisë kur ata tentuan të miratojnë ligjin për çmimet tavan.
Lidhja Demokratike e Kosovës e dërgoi këtë ligj në Gjykatën Kushtetuese, duke argumentuar se ai do të kufizonte veprimtarinë e tregut të lirë. Ky veprim i LDK-së irritoi qeverinë e Kurtit, të cilët akuzuan vazhdimisht partinë opozitare.
Murati në postimin e tij edhe një herë ka akuzuar LDN-në për çmime të larta, me arsyetimin se kjo nuk do të ndodhte nëse nuk parandalohej Ligji për Çmimet Tavan.
Megjithatë, i menjëhershëm ka qenë reagimi i deputetit Bajrami, i cili ka theksuar se LDK-ja gjithmonë ka mbrojtur kushtetutën dhe rënia e çmimeve ka ndodhur pikërisht si rezultat i tregut të lirë/konkurrencës.
"LDK-ja ka me qënë në mbrojtje të kushtetutës gjithmonë." - tha deputetja.