Storia e gazetarit të Nacionales, Vullnet Krasniqi, rritë kërkimet në Google për familjen Jashari
Sot në Kuvendin e Kosovës është mbajtur një seancë solemne për Epopenë e UÇK-së, siç njihet gjerësisht rezistenca e familjes Jashari në datat 5, 6 dhe 7 mars të vitit 1998. Aty ishte edhe gazetari i Nacionales, Vullnet Krasniqi, i cili ua shtroi një pyetje deputetëve të Kuvendit të Kosovës. “Sa familjarë të familjes së ngushtë Jashari janë vrarë më 1998?” – ishte pyetja e z. Krasniqit.
Ajo çfarë ngjau pas pyetjes krejt të thjeshtë të z. Krasniqit, ishte për t’u mbajtur mend gjatë. Deputetët e pyetur, që kishte nga pushteti e nga opozita, nuk arritën të tregojnë numrin e saktë të të vrarëve të familjes së komandatit legjendar Adem Jashari, emrin e të cilit deputetët e përmendin shumë gjatë dative 5, 6 dhe 7 mars të çdo viti.
Megjithatë, ka edhe një histori tjetër në këtë mes. Pas postimi të videos së gazetarit Krasniqi në faqen e Nacionales, qytetarët kanë filluar të kërkojnë në internet për numrin e saktë të të vrarëve të familjes së ngushtë së komandantit Jashari. Pra 1 orë pasi u botua reportazhi nga Kuvendi, janë shtuar kërkimet në “Google” për familjen Jashari. Sipas lokacionit, kërkuesit e shumtë rreth familjes Jashari janë nga Kosova.
Sipas të dhënave, vërehet se aktualisht është piku më i lartë i njerëzve që kanë kërkuar informata më të hollësishme për familjen Jashari në 12 muajt e fundit. Në këtë kontekst, storia e gazetarit Krasniqi ka ngjallur debat, duke i shtyrë njerëzit të mësojnë më shumë detaje për familjen Jashari.
Siç shkroi Nacionale, shumë qytetarë kanë reaguar, duke kritikuar deputetët për përgjigjet e tyre të pasakta. Në postimin e Nacionales, qytetarët janë shprehur të indinjuar nga mungesa e përgjigjeve të sakta nga ana e deputetëve të Kuvendit të Kosovës.
“Marre, mjerim” – shkroi një qytetar.
Një tjetër qytetar shkroi: “Bravo gazetar keta jan turpi qe ne na perfaqesojn si shtet.”
“Marre, marre, marre…” – e filloi një qytetar tjetër komentin e tij.
