Sot prova e radhës: A i ka siguruar votat VV-ja për Albulena Haxhiun?
Sot në Kuvendin e Kosovës do të tentohet sërish konstituimi i Kuvendit.
Pas tri dështimeve për të siguruar 61 vota për Albulena Haxhiun, mbetet të shihet nëse sot ka ndonjë ndryshim.
Përderisa në dy herët e para Haxhiu mori nga 57 vota, në herën e tretë ajo nuk doli fare në votim.
Kjo pasi kryetari i Kuvendit, Glauk Konjufca, kërkoi kohë më shumë për konsultime dhe marrëveshje politike me partitë e tjera.
Megjithatë, as nuk pati konsultime, e lëre më marrëveshje.
Si rezultat, sot vështirë se mund të ketë ndryshim të situatës.
Mbetet të shihet vota e Nismës e cila deri më tash ka abstenuar, përderisa Duda Balje në herën e fundit nuk ishte fare në Kuvend.
Kryetari i PDK-së, Memli Krasniqi, u shpreh në mënyrë tonike se Albulena Haxhiut, as që bëhet fjalë të ketë votë për Kryetare të Kuvendit...”i kanë 47 të tjerë, qikjo jo”.
“Ata e kanë të drejtën që emër me propozu, por jo m’e imponu. Sepse nuk mundet me çdo kusht me vendos për këdo që e propozon... Kandidatja e cila ka dështuar disa herë radhazi, do të dështojë sot e nesër, e kurdoherë tjetër. Nuk mundet me e qenë më e rëndësishme se krijimi i institucioneve”, tha Krasniqi.
“Haxhiu në asnjë moment e rrethanë nuk do të ketë mbështetjen tonë. Ajo është simbol i dështimit të kësaj qeverie të kaluar. Krejt mandatin e ka pasur të përcjellur me skandale të ndryshme. Prej zhdukjes së mostrave të Astrit Deharit, deri te ulja e buxhetit për mbrojtjen e çlirimtarëve në Hagë”, tha Memli Krasniqi.
Edhe Lidhja Demokratike e Kosovës ka theksuar qëndrimin se nuk e votojnë asnjë kandidat të VV-së për kryetar të Kuvendit.
Nga Aleanca për Ardhmërinë e Kosovës janë treguar më ‘zemërgjerë’ për çështjen e një kandidati nga Vetëvendosje, por që ai të jetë konsensual. Ramush Haradinaj ka thënë se AAK do të votonte figura si Saranda Bogujevci ose Shqipe Selimi.
“Nëse LVV-ja do të kishte kandidate për kryeparlamentare, Saranda Bogujecvin apo Shqipe Selimin, AAK-ja do t’i votonte”, tha Haradinaj.
Megjithatë, vetë Shqipe Selimi dhe Saranda Bogujevci kanë thënë se opozita nuk mund t’ia përcaktojë kandidatët VV-së, pasi kjo e fundit ka fituar 48 deputetë në zgjedhje.
Mbetet të shihet nëse do të arrijnë që t’i sigurojnë 61 vota, apo 48 orëshi do të vazhdojë edhe këtë javë.
