Sorensen me vizitë të paparalajmëruar në Kosovë, mban takim me komandantin e KFOR-it
Emisari i Bashkimit Evropian për dialogun Kosovë-Serbi, Peter Sorensen po zhvillon një vizitë të paparalajmëruar në Kosovë, ku së pari ka takuar komandantin e KFOR-it, Enrico Barduani.
KFOR në një komunikatë për media, ka njoftuar se takimi është mbajtur sot, ku i pranishëm ka qenë edhe shefi i zyrës së Bashkimit Evropian në Kosovë, Aivo Orav.
“Vizita e sotme në Kosovë ishte e dyta në mandatin e Sorensen; si i tillë, ai nuk e humbi rastin të shkëmbejë mendime me Komandantin e KFOR-it për zhvillimet në situatën e sigurisë në mbarë rajonin.
Komandanti i KFOR-it nënvizoi përpjekjet e KFOR-it për të siguruar një mjedis të sigurt për të gjithë njerëzit që jetojnë në Kosovë dhe në mbështetje të dialogut të lehtësuar nga BE-ja ndërmjet Prishtinës dhe Beogradit, ku KFOR-i dhe BE-ja veprojnë në koordinim të përhershëm” – thuhet në njoftim.
Ndërkohë, mediat në Kosovë kanë raportuar se Sorensen pritet të takohet me zëvendëskryeministrin në largim, Besnik Bislimi.
Nacionale ka dërguar pyetje te zëdhënësit e BE-së për të mësuar më shumë rreth agjendës, por deri në këto momente nuk kemi marrë përgjigje.
