Shtëpia e Bardhë pas telefonatës me Kurtin: Të gatshëm t’ia sigurojmë burimet KFOR-it për misionin e tij

Shtëpia e Bardhë ka publikuar një deklaratë rreth telefonatës mes kryeministrit të Kosovës, Albin Kurti, dhe këshilltarit të presidentit Biden për Çështje të Sigurisë Kombëtare, Jake Sullivan, ku tregohet se për çfarë është biseduar.

Në deklaratë thuhet se Sullivani shprehu ngushëllime për humbjen e një zyrtari policor të Kosovës, Afrim Bunjaku, në krye të detyrës gjatë sulmeve të dhunshme që ndodhën më 24 shtator.

“Ai gjithashtu shprehu shqetësim për mobilizimet e ushtrisë serbe afër kufirit të Kosovës”- thuhet në deklaratë.

Sipas njoftimit, Sullivani i vuri në pah vendimet e marra rishtazi nga NATO-ja për t’i fuqizuar praninë dhe aktivitetin e KFOR-it, sidomos në pjesën veriore të Kosovës, dhe “e nënvizoi gatishmërinë e Shteteve të Bashkuara për të punuar me aleatët tanë për t’u siguruar që KFOR-i mbetet me burime të duhura për ta përmbushur misionin e tij”.

Për më tepër, në deklaratë thuhet se Sullivani dhe Kurti diskutuan për dialogun e ndërmjetësuar nga BE-ja mes Kosovës e Serbisë, për të cilin zyrtari amerikan theksoi se është zgjidhja e vetme afatgjate për ta siguruar stabilitetin në mbarë Kosovën.

Edhe kryeministri i Kosovës, Albin Kurti, mbrëmë ka treguar për bisedën telefonike Jake Sullivan.

Përmes një shkrimi në Twitter, Kurti ka njoftuar se e ka falënderuar Sullivanin për mbështetjen e ShBA-së në sigurinë kufitare, teksa kërkoi ndihmë më të madhe kundër siç tha ai, planeve luftarake të Serbisë.

“Thirrje inkurajuese me Jake Sullivan. E falënderova ShBA-në për mbështetjen ndaj sigurisë kufitare të Kosovës dhe kërkova ndihmë të shtuar kundër planeve luftarake të Serbisë. E siguroi atë për bashkëpunimin e vazhdueshëm të Policisë së Kosovës me KFOR-in dhe se përkushtimi ynë për të mbrojtur të gjithë qytetarët është i palëkundur.” – ka shkruar Kurti.

ShBA i kërkon Serbisë t'i largojë trupat ushtarake nga kufiri me Kosovën

Pas sulmit të fundit në veri, SHBA-ja e ka shtuar presionin ndaj Serbisë.

Koordinatori për komunikime strategjikë në Këshillin e Sigurisë Kombëtare të ShBA-së, John Kirby i ka bërë thirrje Serbisë që ta largojë ushtrinë nga kufiri.

Kështu raportohet të ketë deklaruar ai në një bisedë me gazetarë, ku ka thënë se “do ta monitorojnë dislokimin e madh serb gjatë kufirin me Kosovën”.

“Ne do të monitorojmë dislokimin e madh serb përgjatë kufirit me Kosovën. Ne i bëjmë thirrje Serbisë të tërheqë forcat nga kufiri dhe të vazhdojë të ulë tensionet.” – ka thënë ai sipas REL-it.

Po ashtu, ai është shprehur se kjo dhunë që po ndodhë është shqetësuese.

“Ky cikël shqetësues i dhunës është përkeqësuar.” – është shprehur ai.

Ndërsa, presidenti serb, Aleksandër Vuçiq, sipas mediumit serb opozitar, “Nova.rs”, ka deklaruar që ka pasur një bisedë me sekretarin amerikan, Antony Blinken kur janë pajtuar për nevojën e deeskalimit të situatës.

“U pajtuam që ka nevojë për deeskalim, për një rol më të madh të KFOR-it, dhe se Serbia definitivisht mbështet një rol më të madh të KFOR-it dhe do të donim të ishte ekskluzivisht në veriun e Kosovës.” – ka thënë ai.

Po ashtu, Vuçiq ka bërë të ditur se Blinken i ka folur për masa, por se pretendoi se ky i ka “kundërshtuar ato”.

“Blinken foli edhe për disa masa, thash që jam kundër kësaj.” – ka thënë ai.