Selmanaj për foton me Prekun: E kam mik të djalit të axhës, nuk e njoh
Gjatë ditës së djeshme u raportua për një plan për vrasjen e kryeministrin Albin Kurti, deputetit Xhavit Haliri dhe një komandanti me emrin Ismet Haxha. Prek Kodra, dyshohet se në krejt këtë, kishte rolin e atentorit/vrasësit. Ndërkaq, sot u publikua një fotografi e Driton Selmanajt me personin në fjalë. Ky i fundit, Nacionales i shpjegoi se si erdhi deri te takimi, ndërsa na tha se nuk ia ka ditur as emrin.
Selmanaj shihet me një person tjetër dhe Prek Kodrën, në një fotografi të publikuar nga mediat. Deputeti në fjalë, i tha Nacionales se fotografia është bërë para dy viteve, dhe personit nuk ia ka ditur as emrin.
Sipas tij, një mik i familjarit (djalit të axhës) e ka ftuar në këtë takim me Kodrën, dhe kanë qëndruar përreth dy orë.
“Po e tregoj rastin si është. Personin në mes, në fotografi, është miku i djalit të axhës tim. Isha duke ardhë prej Prizrenit në Prishtinë para dy vite, më ka thirrë djali i axhës, më ka thënë Driton a po vjen se i kam do mysafirë prej Shkodre? Kam shku, kam pi kafe, kam ndejtë një 1 orë a dy orë, as emër, as mbiemër (qesh). Sot kur më ka kontaktu ai portal, e mora vesh kush ka qenë, qysh ka qenë. Dmth është mik i djalit të axhës, hera e parë që e kam taku dhe e fundit. As emrin nuk ia kam ditë”, i tha Selmaj Nacionales.
Pyetur se a është takuar ndonjëherë tjetër me Kodrën, Selmanaj mohoi një gjë të tillë, duke përsëritur se nuk ia kishte ditur as emrin.
“Kurrë, kurrë, hera e parë dhe e fundit ka qenë aty, djali i axhës ka thënë kam mysafirë. As emrat nuk i kam marrë, nuk kemi bisedu për emra, janë miqtë e tij që kanë ardhë. Dy vetë ka qenë, ai dhe dikush tjetër. Para dy viteve është kjo punë”, tha Selmanaj.
Nacionale e pyeti deputetin e LDK-së edhe për raportimet nëpër media dhe në rast se, kur ka parë Prek Kodrën, i është kujtuar takimi me të.
“Absolutisht, absolutisht. Ma ka dërgu portali fotografinë, s’e kam pasë idenë kush është ai person, s’ia kam ditë emrin as atëherë as sot. Hera e fundit, u mbyll gjithçka aty. Ndodhë shpesh, ulemi në tavolina, edhe gjatë fushata, me njerëz të çfarëdo natyre, por ne nuk i dimë ato”, ka thënë ai.
Çfarë thanë Qeveria e Xhavit Haliti?
Ndërkaq, në lidhje me raportimin që fillimisht u bë nga mediumi shqiptar, A2CNN, për Nacionalen të hënën folën edhe nga Zyra e Kryeministrit.
Ata na thanë se kryeministri ka qenë në dijeni për këtë plan për atentat ndaj tij.
“Kryeministri i Republikës së Kosovës, Albin Kurti, ka qenë i njoftuar për këtë rast nga Agjencia e Kosovës për Inteligjencë. Institucionet e sigurisë i kanë ndërmarrë të gjitha masat për parandalimin e këtij veprimi. Rasti nuk është bërë publik për të mos përhapur panik.” – thuhet në këtë përgjigje.
Përveç kryeministrit, plan kishte pasur edhe për vrasjen e deputetit Xhavit Haliti dhe një komantant i UÇK-së me emrin Ismet Haxha.
Deputeti Xhavit Haliti, po ashtu ka konfirmuar se ka pasur vazhdimisht raste kur është njoftuar për ndonjë atentat të mundshëm ndaj tij.
Ndërkaq, sot për Euronews ai tha se nuk mori mbrojtje as nga instituconet për këto kërcënime.
“Detajet që janë përshkruar në ato dokumente unë nuk i kam ditur, sepse me siguri kanë qenë sekret i Policisë së Shtetit. Unë kam pasur informacion që po përgatitet diçka, që jam i rrezikuar, informacionin ma ka dhënë Policia e Kosovës. Nuk i kam ditur detajet, kush është, çfarë qëllimesh kanë, se kam ditur edhe për dy të tjerët të cilët e kishin bërë planin", tha ai.
Kush është Prek Kodra?
Prek Kodra është personi që ‘preku’ opinionin publik në Kosovë sot, pas raportimeve tashmë të konfirmuara për një plan për vrasjen e kryeministrit Albin Kurti, deputetit Xhavit Haliti dhe një komandanti me emrin Ismet Haxha. Por, kush është Preku që planifikohej të vriste kryeministrin Albin Kurti?
Sipas dokumentit, roli i Prek Kodrës në serinë e atentateve që kishin për qëllim destabilizimin politik të Kosovës, ishte ai i atentatorit/vrasësit. Policia shqiptare e përshkruante Prekun (që në disa dokumente quhet Prekë) si person që dinte se si të përdorte edhe armën e zjarrit snajper.
Paraprakisht mësohej që planifikohej të vritej Ismet Haxha, dhe më pas Xhavit Haliti. Një muaj pas vrasjes së deputetit të PDK-së, do të vritej edhe Albin Kurti për t’u dukur si akt hakmarrjeje.
Nacionales i kanë ardhë shumë informacione për personin që thuhej se duhej të realizonte planin në fjalë me armë në dorë. Shumë prej këtyre informacioneve janë të paverifikuara.
Një informacion i verifikuar megjithatë për z. Prek Kodra, është se ai ishte arrestuar në verën e vitit 2011 pasi kishte penguar mbajtjen e zgjedhjeve lokale në Shalë të Shkodrës. Ai raportohej se ishte simpatizant i njërës prej dy partive të mëdha të Shqipërisë (Partia Socialiste-Partia Demokrate).
46 vjeçari del se është nga fshati Shtoj i Ri në Shkodër. Ai ishte dyshuar edhe për lidhje të forta me mafian e Malit të Zi, me nipin e tij që pretendohet të jetë zënë me substanca narkotike dhe të ketë pasur probleme ligjore me këtë vend.
“Ka lidhje të forta me malazez. Këta (grupi i Kodrës) bëjnë krime dhe i mblulojnë se kanë lidhje me shtetin.” – i tha një burim që donte të mbetej anonim për shkaqe sigurie.
Nipi i z. Kodra raportohet të jetë Pëllumb Guri, i cili madje edhe kishte shtënë në drejtim të zyrtarëve policorë malazez kur ishte penguar në aktivitetet e tij që kishin të bënin me transportimin e 88 kilogramëve lëndë narkotike kanabis sativa.
Policia e Shtetit shqiptar kishte qenë në banesën e z. Kodra, ku kishin gjetur një numër të madh armësh por jo edhe personin në fjalë. Ai i kishte dy fëmijë të mitur në momentin e bastisjes nga forcat e rendit.
