Qumështorja “VITA” demanton Mujën dhe AUVK-në: Ministri publikoi të dhëna, por jo rezultatet e analizave
Qumështorja “VITA” ka reaguar pas konferencës së Ministrisë së Bujqësisë dhe Agjencisë së Ushqimit dhe Veterinarisë së Kosovës (AUVK), duke i kundërshtuar deklaratat e bëra nga ministri Armend Muja.
Në reagimin e saj, “VITA” ka thënë se të dhënat e prezantuara gjatë konferencës nuk përbëjnë rezultatet e analizave të mostrave të produkteve të kompanisë.
Sipas kompanisë, informacionet e prezantuara nga ministri Muja mund të gjenden në institucionet përkatëse, përfshirë Administratën Tatimore të Kosovës, Doganën e Kosovës dhe AUVK-në, ndërsa rezultatet e analizave laboratorike nuk janë publikuar.
“Rezultatet e analizave të mostrave nuk u publikuan! Ne jemi të bindur që të gjitha produktet tona janë të etiketuara në përputhje me dispozitat ligjore. Sidoqoftë, Ministria dhe AUVK duhet të dalin dhe t’i publikojnë rezultatet e analizave të mostrave, të cilat tash e 33 ditë nuk po na i dërgojnë dhe tanimë janë edhe në shkelje ligjore”, thuhet në reagimin e “VITA”-s.
Kompania ka ftuar Ministrinë e Bujqësisë dhe AUVK-në që t’i publikojnë menjëherë rezultatet e analizave.
Lidhur me pretendimet për furnizimin me ujë dhe numrin e punëtorëve, “VITA” ka deklaruar se është e pajisur me leje ujore dhe impiant për trajtimin e ujërave të ndotura, ndërsa për numrin e punëtorëve ka thënë se të dhënat janë të deklaruara në Administratën Tatimore të Kosovës.
“VITA” ka theksuar se të gjitha produktet e saj janë prodhim nga qumështi i freskët i fermerëve kosovarë dhe se kompania është lider në industrinë e qumështit.
Në fund të reagimit, kompania i ka bërë thirrje ministrit Muja që të ndalojë, siç i ka quajtur ajo, “shpifjet”, dhe të publikojë vetëm të dhëna të verifikuara.
Reagimi nga Vita:
