Qerkini: Në marrëveshje të jetë një pikë e veçantë për të pagjeturit, përmenden veç një herë
Kryetari i shoqatës “Zëri i Prindërve”, Bajram Qerkini ka komentuar propozimin e BE-së duke thënë shprehur i shqetësuar se në atë planë përsonat e pagjetur përmenden vetëm një herë.
Ai përEkonomia Online ka thënë se kryeministri, Albin Kurti, nuk e ka mbajtur premtimin kur thoshte se nuk do të kishte dialog me Serbinë deri sa të zbardhet çështja e të pagjeturve.
Më tej, ai ka kërkuar që familjet e të pagjeturve të informohen për atë se çka bisedohet në Bruksel.
“Qendra Burimore mundohet t’i përcjellë dhe e përcjell çdo frymëmarrje të qeverisë, të gjithë atyre që flasin për personat e pagjetur. Shumë pak gjëra po merren vesh se çka është duke ndodhur në bisedime në Bruksel. Atë që jemi duke kuptuar ne, është mëkat shumë i madh, është premtuar, është thënë se kaptina e parë, neni i parë, bisedimet e para do të bëhen për persona të pagjetur. ‘Pa u zbardhur fati i personave të pagjetur ngrihen të gjitha bisedat e tjera’. Ne si familjarë nuk jemi për t’u ngrirë dialogu, por jemi që të jetë një pikë e veçantë për persona të pagjetur dhe të jetë humane, se punët politike të cilat i kanë paraparë në këto 11 pika kanë me vazhduar me vite e vite, se janë punë politike. Këtë pjesë duhet që të jetë si është premtuar dhe si garanton me konventa ndërkombëtare mos të na shkelin të drejta e njeriut. Neve po na shkelin të drejtat e njeriut.” – ka thënë ai.
Ndërkaq, ai pati disa fjalë edhe pse nuk është përmendur më shumë në propozimin e BE-së çështja e të pagjeturve.
“Keni kujdes se ku e keni vendosur. Është marre që të thuhet këtu ‘për postë’, për s’di çka, e në fund thotë edhe për persona të zhdukur. Këtë term duhet të largohet se nuk janë të zhdukur, ata janë “të marrun peng’. Bashkësia ndërkombëtare na ka borxh që të tregojë ku i ka fshue Serbia, sepse janë imazhet satelitore”.
Qerkini, i cili e ka ende të pagjetur djalin që nga lufta e vitit 1999, kërkon që termi i “zhdukur” të largohet dhe të përdorer “i marrë me dhunë”.
“Çka kam hjekë me e rrit, e mos me ditë qe plot 24 vite se ku është”, shprehet Qerkini për djalin e tij që e ka të pagjetur duke thënë se termi i “zhdukur” duhet të largohet dhe të zëvendësohet me “i marrë me dhunë”.
“Në prill bëhen dy vite që nuk është mbajtur premtimi për persona të pagjetur, as dialog për persona të pagjetur. Ku është faji, a është faji te ndërkombëtarët apo tek ne vetë si shtet, apo njerëzit që janë duke e udhëhequr dialogun. 90 për qind ne i kemi fajet, nuk mund të premtojmë diçka kur nuk jemi të zotë të realizojmë. Duhet të dalin dhe të shpjegojnë se nuk po na lejojnë ndërkombëtarët për zbardhjen e fatit të pagjetur. Ku është qëllimi, ku është esenca, pse nuk po dalin? Neve na vyejnë negociatat, nuk është Millosheviqi… duhet që të bisedohet me ta dhe të kërkohet nonstop ndihma e bashkësisë ndërkombëtare. Kjo është për mua neglizhencë, mosdije apo në një mënyrë njerëz që nuk kanë ndjenja njerëzore.” – ka thënë ai.
