Mungesa e teksteve shkollore, opozita kërkon seancë të jashtëzakonshme të Kuvendit
Subjektet politike opozitare kanë thirrur seancë të jashtëzakonshme parlamentare për mungesën e teksteve shkollore për nxënësit që kanë filluar sot vitin shkollor.
Kërkesën për seancë e kanë bërë anëtaret e Komisionit Parlamentar për Arsim.
Deputetja e PDK-së, Eliza Hoxha, ka bërë me dije se kjo kërkesë e komisionit është mbështetur edhe nga deputetët tjerë.
Ajo ka treguar se seanca synohet të mbahet të hënën.
“Prandaj, ne, deputetët e opozitës – anëtarë të Komisionit për Arsim, të mbështetur nga deputetët e tjerë, kemi iniciuar thirrjen e Seancës së Jashtëzakonshme të Kuvendit e cila do të mbahet të hënën, më 04 shtator. Në kushtet e paaftësisë dhe mosveprimit të qeverisë, Kuvendi duhet të ndërpres pushimin dhe ti kthehet punës, e të diskutoj mbi përgjegjësinë e qeverisë për këtë dështim të pashembullt në përmbushjen e mandatit kushtetues e ligjor të saj’, ka shkruar ajo në profilin e saj në “Facebook”.
Ajo ka bërë me dije se dështimi për sigurimin e teksteve shkollore për nxënësit është prej skandaleve më të mëdha të kësaj qeveria.
“Ky vit i ri shkollor, po fillon i shoqëruar me njërin prej skandaleve më të mëdha të kësaj qeverie: pse Dështimin për sigurimin e teksteve shkollore për nxënësit, nga klasa e parë deri në klasën e nëntë. Shkollat janë të papërgatitura, nxënësit nuk kanë tekste shkollore e materiale mësimore, ndërsa familjet e prindrit janë të braktisur. Mbi 200 mijë nxënësve nuk do t’iu ofrohen në shkolla tekstet falas, ashtu siç e përcakton ligji dhe ashtu siç ka ndodhur për më shumë së një dekadë”, ka shkruar ajo.
Në kërkesën për seancë të jashtëzakonshme, e cila i është drejtuar kryetarit të Kuvendit, Glauk Konjufca thuhet se ministria ka dështuar ta përmbushim obligimin ligjor për nxënësit.
“Derisa ligji në fuqi për arsimin parauniversitar ka përcaktuar se shkollat fillore është i detyrueshëm dhe i njëjti ofrohet falas. Qeveria e Republikës së Kosovës, përkatësisht Ministria e Arsimit, Shkencës, Teknologjisë dhe Inovaconit për herë të parë ka dështuar të përmbush detyrimin ligjore për ofrimin e teksteve falas për nivelin e Arsimit Fillor dhe të Mesëm të Ulët”, thuhet në kërkesë.
Qeveria pretendon se i ka bërë të gjitha përgatitjet
Pavarësisht kritikave të opozitës, Ministria e Arsimit Shkencës, Teknologjisë dhe Inovacionit ka bërë me dije se i ka ndërmarr të gjitha përgatitjet për fillimin e vitit të ri shkollor.
Me anë të një mesazh të publikuar mëngjesin e së premtes, ministrja Nagavci, ka deklaruar se ministria është duke punuar vazhdimisht për përmiresimin e infrastrukturës shkollore dhe ligjore.
“MASHT në bashkëpunim dhe me komunat e shkollat, ka bërë të gjitha përgatitjet e duhura për fillimin e vitit të ri shkollor. Si ministri po punojmë çdo ditë për të përmirësuar infrastrukturën shkollore e ligjore…” – ka deklaruar ajo.
Një ditë më parë, edhe kryetari i LDK-së, Lumir Abdixhiku ka drejtuar kritika të ashpra ndaj Qeverisë për dështimin që t`i furnizojë me libra falas nxënësit.
“Pamjet që po i shihni janë të kaosit organizativ, të tollovisë, pritjes e maltretimit – janë pamje të përpjekjes së përditshme të prindërve kosovarë të cilët, pa asnjë nevojë e asnjë logjikë, u bënë subjekt i eksperimentit komplikues të Qeverisë.”, ka deklaruar Abdixhiku.
Në adresimin e tij në “Facebook”, ai ka treguar për problemet që po hasin prindërit në procesin e aplikimit për subvencionimin e lirave për nxënësit.
“Pritje në rend, paqartësi mbi blerjen e librave, bartje nëpër librari të ndryshme e aplikime për rimbursim janë disa nga telashet e panevojshme – tërësisht të panevojshme – të krijuara nga vet qeveria.”, ka thënë i pari i LDK-së.
