“Makthi i opozitës”: LDK në 'sulm' të pakuptueshëm ndaj partive tjera opozitare
Lumir Abdixhikut, megjithëse kryetar i një partie opozitare, duket se me çdo kusht po kërkon ta distancojë veten nga partitë e tjera opozitare. Vetëm në njëzet e katër orët e fundit, janë bërë dy ‘distancime’ domethënëse.
Në një intervistë për KosovaPress, i pyetur nëse e përkrahte idenë e një fronti opozitar, Lumir Abdixhiku u tregua... i rreptë në përgjigje.
“Ne jemi parti të ndryshme. LDK-ja nuk ka lidhje me PDK-në e AAK-në. Aq më pak me parti tjera joparlamentare,” – ishte shprehur ai.
Në fakt, LDK-ja ndan fatin e njëjtë opozitar me të dy partitë e lartpërmendura, ndërsa ndan edhe kritikat e njëjta ndaj Kurtit shpesh edhe ndaj partisë joparlamentare të papërmendur e që është PSD-ja.
Dhe, si duket këto mesazhe të Abdixhikut i mori shumë afër zemrës Paris Guri, kryetar i Forumit Rinor të LDK-së, i cili në llogarinë e tij në Facebook do të shkruante këto fjalë:
"Makthi i pozitës e i opozitës!"
Paris Guri
Në bazë të kësaj, Abdixhiku sipas kreut të të rinjve në LDK nuk është veç makthi i Albin Kurtit, por edhe i Memli Krasniqit, Ramush Haradinajt e Dardan Molliqajt.
Armiqësinë ndër-opozitare duket se e ka nuhatur deri tash vetëm kreu i PSD-së, Dardan Molliqaj, që do të shkruante një përgjigje të rëndë e paksa personale.
“Bëje Asociacionin Albin!” – po thotë Lumiri. Shihe logjikën: e jap këshillën unë, ia hapi rrugën këtij, e bëj edhe një plus kah Dragodani, dhe presim pastaj se ky që po e realizon këshillën time publike do të dëmtohet. Kjo me siguri se nuk është analizë, por ç’të thuash?! Duket se kompleksi “arsyeton” gjithfarë absurdi.” – kundërsulmoi Molliqaj.
Deri tash nuk ka ndonjë indikacion se do të përgjigjen në këto deklarata të LDK-së edhe partitë tjera opozitare derisa mundësia e një fronti të përbashkët kundër kryeministrit Kurti duket... e largët.
Abdixhiku në anën tjetër është sulmuar ashpër për deklarimet e tij të fundit nga eksponentë të ndryshëm të partisë në pushtet (Vetëvendosje) për komentet e tij negative ndaj Albin Kurtit.
Kujtojmë se në një sondazh të fundit të përgatitur nga administratorët e Nacionales në Viber, Abdixhiku doli si opozitari më i vlerësuar duke marrë gati 50 për qind të votave.
