“Kurti po e bën Kosovën me 23 mijë foshnja”, shpërthejnë talljet me kandidatin e VV-së: Me VV-në kurrë s’mundem me e prek fundin

Një status i çuditshëm i kandidatit të VV-së për deputet, Luan Gacaferi, ka nxitur reagime të shumta.

Pretendimi i tij se falë Albin Kurtit, Kosova po bëhet me 23 mijë foshnje për 10 muaj, ka bërë që të shpërthejnë talljet në rrjetet sociale me deputetin e pushtetit.

Në profilin e tij në “Facebook”, Gacaferi pretendon se shefi i ekzekutivit po e bën shtetin me fabrika të municionit dhe fëmijë.

“Albin Kurti përveç se po e bënë Kosovën me fabrika të armatimit, Kosovën po e bënë edhe me gati 23 mijë foshnje në 10 muaj❤️💪”, ka shkruar ai në Facebook.

Kur një komentues e ka pyetur kandidatin se si e ka arritur Kurti një gjë të tillë, Gacaferi ka bërë një gabim edhe më të madh.

Duke dashur të thotë se shtesat për fëmijëve kanë ndikuar në rritjen e natalitetit, ai ka shkruar se këto shtesa kanë ndikuar në rritjen e "fatalitetit".

Ndër të parët që ka reaguar ka qenë aktivisti i PSD-së, Azdren Shala.

Duke u tallur me kandidatin e VV-së, Shala ka shkruar se Gacaferi po mendon që Kurti ka derdhur djersë për lindjen e foshnjave.

“Qysh folka deputeti potencial, mendon njeri qe Albini ka derdh djerse pse kane linde 23.000 fshonje. Per qato tani Dimali e Mefi kane me u doke normal aty. Votone tash n'guxofshit!”, ka shkruar Shala në profilin e tij në “Facebook”.

Statusin në fjalë e ka komentuar edhe analisti Ilir Mirena.

Në profilin e tij në “Facebook”, ai ka shkruar se kjo flet për “budallallëkun” e partisë në pushtet.

“Thote nje fjale, “kurre mos mendo qe e ke prek fundin, taman mendon qe s’ke ku shkon ma poshte, veç kur te ndijsh nje trokitje nen ty, dikush eshte edhe ma poshte”… Edhe me VV’ne kurre s’mundeni me e prek fundin. Taman mendon qe s’ka ku shkon me poshte se sa me Mefin, Dimalin, Adriana Matoshin a Donika Gervallen, veç kur te ndish çifti i k’tij kah troket prej nje kati me poshte…”, ka shkruar ai.

Kurse, gazetari Berat Buzhala ka vlerësuar se Luan Gacaferi dhe deputeti i VV-së, Mefail Bajqinovci janë në garë të ngushtë për budallallëk.

“Kur mendon qe pertej Mefit nuk mundesh me shku, fjalen e merr Luani, kandidati hit i LVV'se per deputet”, ka shkruar Buzhala.

Ndërsa, Ali Sefaj ka kundërshtuar pretendimet e kandidatit të VV-së për deputet.

Në profilin e tij në “Facebook”, ai është tallur keq me Gacaferrin, duke shkruar se ndoshta anëtaret e VV-së i ka ndihmuar partia për të lindur fëmijë.

“Ndoshta anëtarëve të VV-së dhe të Listës Guxo iu kanë ndihmu partia edhe mi ba fëmijët, ama ne të tjerët i kemi ba vet!😅”, ka shkruar Sefaj.

Kjo nuk është hera e parë që zyrtarët e lartë të partisë në pushtet shprehin pretendime të fuqishme.

Gjatë këtij mandati, jo rrallë ministrat e Qeverisë Kurti dhe deputetët e VV-së janë bërë “meme” më deklaratat e tyre të çuditshme.

Luan Gacaferri është kandidat i partisë Guxo, kandidatët e secilës për zgjedhjet e 9 shkurtit garojnë në listën e VV-së.