"Por jo mua": Kujt i mungoi Vuçiqi në Berlin, sipas Albin Kurtit?
Kryeministri i Kosovës, Albin Kurti, u shpreh para medieve në lidhje me shumë çështje, por, megjithatë, mbeti mjaft enigmatik. E enigmë na e la edhe një fjali të tij se “ndoshta dikujt i ka munguar Vuçiqi”.
I pyetur nga gazetarët se a i ka munguar samitit presidenti i Serbisë, Aleksandër Vuçiq, ai u shpreh si vijon:
“Nuk është se mungoi fort. Ndoshta dikujt po, por jo mua” – tha ai në gjuhën shqipe.
Për kë mund ta kishte fjalën kryeministri i Kosovës?
Një mundësi reale është që ta kishte pasur fjalën për kryeministrin e Republikës së Shqipërisë, Edi Ramën.
Ky i fundit ishte bërë pjesë e nismës së Ballkanit të Hapur, një ide rivale ndaj Procesit të Berlinit, i cili u riaktivizua sot. Pjesë e Ballkanit të Hapur është edhe Maqedonia e Veriut.
Por Vuçiqi mund t’i ketë munguar edhe Zoran Tegeltisë nga Bosnja dhe Hercegovina.
Tegeltija është politikan serb nga Bosnja që shërben si kryesues i Këshillit të Ministrave të Bosnjës dhe Hercegovinës nga dhjetori i vitit 2019. Ky është ekuivalenti i pozitës së kryeministrit.
E mund t'i ketë munguar edhe znj. Ana Bërnabiq - kryeministre e Serbisë. Kurti madje u shpreh se Vuçiqi i kishte lënë Bërnabiqit në dorë një detyrë mjaft të vështirë për t'u përballur në samit të Berlinit.
Megjithatë, vlen të thuhet që kryeministri Kurti në foton zyrtare të përbashkët ishte pranë kryeministrit shqiptar Edi Rama.
Raportimi i Nacionales:
Kryeministri i Kosovës, Albin Kurti, ka folur para gazetarëve të Kosovës pas përfundimit të Samitit të Berlinit në një paraqitje mjaft interesante.
Kurti një nga adresimet kryesore e pati për planin franko-gjerman dhe marrëveshjen finale ndërmjet Kosovës dhe Serbisë.
Kryeministri i Kosovës deklaroi se është ende herët të diskutohet për detajet e marrëveshjes finale, por tha se janë në rrugën e duhur.
“Së pari, jemi në rrugën e duhur për ta diskutuar kornizëm e marrëveshjes. Deri më tash është diskutuar për hapa të vegjël, momenti i ndryshimit ka qenë në Bruksel më 18 gusht. Aty, për herë të parë, temat aktuale kanë qenë pikë e dytë e rendit të ditës. Pika e parë ka qenë korniza e përgjithshme e dialogut. Si temë këtu vijnë propozimet dhe idetë dhe të gjitha këto propozime që bazohen në vlera evropiane. E shpreh mirëkuptimin tim dhe angazhimin tim konkret, por kjo tregon që jemi në shtegun e duhur dhe e kemi bazën e mirë, mirëpo ka shumë punë që të flitet për ndonjë farë përmbajtjeje përfundimtare. Është ende herët”- tha ai, transmeton gazeta Nacionale.
Kurti tha se nuk mund të japin detaje, pasi aludoi se ka qenë kërkesë e ndërmjetësuesve që të ruhet konfidencialiteti (fshehtësia).
“Së pari, opsionet, modelet, idetë të cilat po prezantohen kohëve të fundit, pa dyshim, janë avancim, meqenëse bëhet fjalë për nocione universale, siç janë integriteti territorial, pavarësia dhe barazia. Kjo është shumë e mirë për marrëveshjen e ardhshme mes Kosovës e Serbisë, që, për bindjen tonë, duhet të jetë finale, ligjërisht e obligueshme dhe patjetër ta ketë njohjen reciproke. Është herët të themi se çka do të përmbajë ajo në fund, por ka lëvizje të duhur nga të ashtuquajtura marrëveshje për zgjidhjen e problemeve të posaçme, që shndërrohen në solucione sui genersis, me hollësi të panumërta, te një marrëveshje e cila është e bazuar në vlerat evropiane”- deklaroi më tutje kryeministri i Kosovës.
“Qeveria e Kosovës nuk do të bëjë asnjë marrëveshje që i cenon integritetin territorial, pavarësinë, kushtetutshmërinë dhe zbatimin e ligjit. Dua të theksoj që sa herë që të na thërrasë Brukseli, Prishtina, Kosova, qeveria jonë është e gatshme, duam dialog parimor, simetrik, të bazuar në vlera evropiane”- tha ai.
Targat, komandanti i policisë në veri, zhgënjimi i Amerikës
Kryeministri i Kosovës tha se pret që pas 21 nëntorit të mos ketë tensionim të situatës, por serbët, të cilët nuk heqin dorë nga targat ilegale, të paguajnë gjoba.
“Për 21 nëntorin, është dita kur makinat që insistojnë të qarkullojnë me targat ilegale të Serbisë si mirëmbajtje e regjimit të Millosheviqit, duhet të paguajnë gjoba. Deri me datën 21 nëntor nuk ka gjoba. Është periudhë 3-javore, kur ka vërejtje, qortime. Pas datë 21 nëntor, do të ketë gjoba. Nuk kam interesim të gjobitet dikush, e as të konfiskoj automjete, por targat të kthehen në RKS. Këtu pengesa nuk është mosinformimi, por terrori nga ana e Beogradit që u bëhet serbëve që kërcënohen e sulmohen edhe me djegie të veturave, atëherë kur tregojnë gatishmëri për t'u integruar në sistemin demokratik të Kosovës së pavarur”- theksoi kryeministri Kurti.
Shefi i ekzekutivit kosovar tha se kanë qenë në koordinim me Amerikën, por, sipas tij, vendimi i Qeverisë është për sundim të ligjit dhe është vendim sovran.
“Tash shtyrja 10-mujore nuk mund të jetë shtyrje, shtyrja mund të jetë 3 javë, një muaj, 2 muaj. Në këtë rast nuk kemi bërë shtyrje, sepse jemi në të drejtën tonë. Në të njëjtën kohë, e kemi shprehur mirëkuptimin për brengat evropiane e amerikane lidhur me mundësitë e cenimit të paqes e sigurisë. Ne dëshirojmë të mos bëjmë kompromis për zbatimin e ligjit, edhe të mos e cenojmë paqen e sigurinë. Ka nisur zbatimi prej 1 nëntorit, nuk ka nisur konfiskimi i targave. Me ShBA-në jemi vazhdimisht në kontakt, nuk ka vendim që shkakton preokupim të paqes e sigurisë e për të cilin nuk i njoftojmë partnerët tanë. Nuk do të thotë se pajtohemi për secilin vendim, por Qeveria e Kosovës është sovrane, nuk mund të thuhet që ka pasur kurrfarë shpërfilljeje të qeverisë sonë ndaj brengave evropiane”- tha ai,
Kryeministri foli edhe për konferencën e djeshme të komandantit të policisë në veri, i cili tha se nuk i zbatojnë urdhrat e Prishtinës.
“Është një gjë, kur dështon zbatimi dhe një gjë tjetër, kur dikush bën thirrje të mos zbatohet vendimi. Por u përket organeve të sigurisë, policisë, që të merren me këtë thirrje, e cila qartazi është në shpërputhje me rendin e ligjin në Kosovë”- argumentoi Kurti.
Ballkani i Hapur apo Procesi i Berlinit?
Kryeministri dha detaje edhe për marrëveshjet e nënshkruara në Bruksel.
“Me udhëheqjen rotative, që fillon me Shqipërinë, samiti i radhës mbahet në Tiranë. Jemi të lumtur që fuqizimi, që këtij procesi ia dha kancelari Scholz, do të vazhdojë në Ballkan dhe kjo e tregon vëmendjen e shtuar që e kanë Berlini dhe Brukseli dhe gjithë BE-ja për vendet e Ballkanit Perëndimor. Na mbetet të bëjmë shumë reforma që tregu i përbashkët rajonal të pasohet me marrëveshje të tjera, të cilët ndërtojnë në katër liritë themelore: të njerëzve, të shërbimeve, mallrave dhe kapitalit”- tha Kurti.
Ai edhe një herë doli kundër Ballkanit të Hapur, duke theksuar se Procesi i Berlinit është iniciativa e vetme për integrimin e Ballkanit në BE.
“Unë nuk besoj që ka dilema që na nevojiten çfarëdo alternativa të tjera përvec Procesit të Berlinit. Është mekanizmi i vetëm i vërtetë për anëtarësim në BE. Të gjithë kemi nevojë për Ballkan Evropian dhe demokratik, që është i hapur për Brukselin, Parisin, Londrën e Uashingtonin, por jo i hapur për autokracitë e ndryshme lindore e verilindore. Procesi i Berlinit fuqishëm po e etablon rrugëtimin evropian të Ballkanit”- përfundoi Albin Kurti.
I pyetur për mungesën e presidentit të Serbisë, Aleksandar Vuçiq, Kurti tha se nuk i mungoi.
“Nuk është që na mungoi fort, dikujt ndoshta, por jo mua”- tha Kurti.
