Jahjaga: Saranda, jemi me ty dhe të mbështesim plotësisht
Ish-presidentja e Kosovës, Atifete Jahjaga i ka dal në mbrojtje nënkryetares së Kuvendit të Kosovës, Saranda Bogujevci pas deklaratës për “shtatzënia pa burra”.
Jahjaga përmes një postimi në Facebook, ka thënë se trupi i gruas nuk duhet politizuar e as instrumentalizuar për qëllime normative.
Ajo tutje i është drejtuar Sarandës “jemi me ty dhe të mbështesim plotësisht”.
Postimi i plotë i saj:
E drejta mbi autonominë trupore i përket secilit individ të shoqërisë. Por, në praktikë, veçanërisht kur bie puna tek të drejtat riprodhuese, janë burrat ata që marrin vendime e japin opinione statike se çfarë duhet të bëhet me dhe mbi trupin e grave.
Është e dhimbshme që sot në Kuvendin e Republikës së Kosovës nuk u votua projektligji për shëndetin riprodhues dhe fertilizim të asistuar. Moskalimi i këtij ligji është një indikator shqetësues që përforcon normat shoqërore dhe rrënjosë mentalitetin sipas të cilit gruaja nuk vendosë për trupin e saj, nuk zgjedhë mënyrën se si e merr epitetin nanë, dhe përfundimisht, lejon që trupi i saj të instrumentalizohet për qëllime të ndryshme shoqërore e politike.
Trupi i gruas nuk duhet politizuar e as instrumentalizuar për qëllime normative! Një grua duhet të vendosë vetë se si dëshiron të bëhet nanë, me kë të bëhet nanë, apo nëse dëshiron të bëhet nanë! Në këtë vendim nuk duhet të ndërhyjë shteti, e aq më pak një burrë, për të përcaktuar se cilat norma shoqërore duhet t’i ndjekë një grua.
Saranda, jemi me ty dhe të mbështesim plotësisht!
