Hoxhaj me videon e radhës, shpalos planet për anëtarësimin e Kosovës në organizata ndërkombëtare
Ish-ministër i Punëve të Jashtme dhe kandidat për deputet i PDK-së, Enver Hoxhaj, ka shpalosur planet e tij për anëtarësimin e Kosovës në organizata ndërkombëtare.
Përmes një video të publikuar në profilin e tij në “Facebook”, ai ka theksuar rëndësinë e anëtarësimit të Kosovës në organizata ndërkombëtare si prioritet kryesor në qeverisjen e ardhshme të PDK-së.
Ai ka deklaruar se, nën udhëheqjen e tij si ministër i Jashtëm, Kosova ka arritur të anëtarësohet në Komisionin e Venecias dhe në Bankën Zhvillimore të Këshillit të Evropës dhe e shumë organizatave tjera ndërkombëtare.
"Një qeveri e ardhshme e udhëhequr nga Partia Demokratike e Kosovës e ka prioritet të lartë anëtarësimin e Kosovës në organizata ndërkombëtare. Do ta përmbyllim anëtarësimin e Kosovës në Këshill të Evropës. Unë e di se si bëhet kjo punë, meqë, sa isha ministër i jashtëm, ne arritëm që ta marrim anëtarësimin e Kosovës në Komisionin e Venecias dhe në Bankën Zhvillimore të Këshillit të Evropës.", ka thënë Hoxhaj.
Hoxhaj ka premtuar përmbylljen e anëtarësimit të Kosovës në Këshillin e Evropës dhe Organizatën Botërore të Shëndetësisë, si dhe përpjekje për t’u bërë pjesë e agjencive të ndryshme të OKB-së dhe vetë OKB-së.
"Do ta anëtarësojmë Kosovën në Organizatën Botërore të Shëndetësisë. Do të bëjmë çdo gjë, për ta bërë pjesë të agjencioneve të ndryshme të OKB-së dhe të vet OKB-së.", ka thënë Hoxhaj në videon e tij të shpalosjes së programit për politikë të jashtme.
Ai ka theksuar se PDK ka përvojën dhe dijen e nevojshme për të realizuar këto objektiva, duke e konsideruar këtë si një hap të rëndësishëm drejt forcimit të pozitës ndërkombëtare të Kosovës.
