Hovenier: Besoj se 24 shtatori s’do të ndodhte nëse dy palët do t’i zbatonin obligimet e marrëveshjes
Ambasadori i Shteteve të Bashkuara të Amerikës në Kosovë Jeff Hovenier në një intervistë për Bloomberg ka folur për sulmin terrorist në Banjskë të Zveçanit. Hovenier beson se ngjarja e 24 shtatorit nuk do të ndodhte nëse palët do të kishin zbatuar plotësisht detyrimet e tyre sipas Marrëveshjes Themelore dhe Aneksit Zbatues.
Hovenier, ka theksuar se beson se po t’i zbatonin të dyja palët obligimet që dalin nga marrëveshja e Brukselit dhe Aneksin Ohrit, sulmi në Banjskë s’do të ndodhte.
“Sigurisht që ngjarjet e 24 shtatorit kanë krijuar më tej një mjedis që është më pak i favorshëm që dy liderë të ulen së bashku nën lehtësimin e BE-së dhe të arrijnë në një mirëkuptim të përbashkët. Por ngjarjet e 24 shtatorit nënvizojnë gjithashtu se sa urgjente është kjo. Më duhet të besoj se nëse të dyja palët do të zbatonin plotësisht detyrimet e tyre sipas Marrëveshjes Themelore dhe Aneksit Zbatues, rrethanat që pamë më 24 shtator nuk do të ndodhnin. Dhe kështu, nga këndvështrimi ynë, është jetike, është urgjente të kthehemi në një proces” ka thënë Ambasadori amerikan.
Tutje, ai ka potencuar rëndësinë që dialogu të vazhdojë në Bruksel nën ndërmjetësimin e Bashkimit Evropian.
“BE-ja po e lehtëson atë, siç duhet, sepse nxitja më e mirë për të dyja palët për të marrë vendime të vështira dhe për të bërë gjëra të vështira është perspektiva për t’u afruar me strukturat dhe institucionet evropiane. Qëllimi përfundimtar është anëtarësimi në BE për të dy vendet, dhe njohja reciproke mes të dy vendeve. Këto janë qëllimet përfundimtare dhe ne besojmë se kjo arrihet përmes këtij stimulimi të anëtarësimit në BE. Pra, është e drejtë që BE-ja të marrë drejtimin” ka shtuar tutje Ambasadori, transmeton Gazeta Express.
