Hodhën poshtë rezolutën që dënon gjenocidin serb në Srebrenicë: Deputetja boshnjake kritikon qeverinë shqiptare
Parlamenti shqiptar hodhi poshtë kërkesën e deputetit të opozitës të enjten për të mbështetur rezolutën që dënon gjenocidin e kryer nga forcat serbe në Srebrenicë në 1995.
Propozimi i deputetit të Partisë Demokratike Tritan Shehu u rrëzua me votat e deputetëve të Partisë Socialiste, të cilët kanë shumicën në Kuvendin e Shqipërisë.
Sabina Cudic, një deputete boshnjake, i ka shkruar një letër të hapur kryeministrit Edi Rama, duke kritikuar refuzimin e qeverisë së tij për të votuar një rezolutë që dënon gjenocidin e Srebrenicës dhe duke e akuzuar atë se e bën këtë si një lëshim ndaj Serbisë.
"Dëshiroj t'ju kujtoj se Gjykata Ndërkombëtare në Hagë gjeti, pa mëdyshje, se forcat serbe kryen gjenocid në Srebrenicë në korrik 1995, ku mbi 8,000 boshnjakë u vranë dhe mbi 40,000 njerëz u dëbuan nga shtëpitë e tyre," shkruan Cudic në letrën e saj.
"Këto janë çështje që nuk duhet të jenë objekt debati politik, si rezultat, ju duhet t'i shpjegoni të gjithë evropës, veçanërisht publikut shqiptar dhe atij boshnjak-hercegovinez, pse Rezoluta që dënon gjenocidin nuk u përfshi në rendin e ditës”, tha ajo.
Mazhoranca socialiste dhe kryeministri Rama thanë të enjten se nuk do ta votojnë rezolutën sepse ajo mbështetet nga deputeti Sali Berisha.
Mocioni për një rezolutë që njeh Srebrenicën si gjenocid të kryer nga forcat serbe dhe refuzimi i saj, shkaktoi një tjetër përplasje mes anëtarëve të Partisë Demokratike të opozitës dhe Partisë Socialiste në pushtet, të cilët shkëmbyen akuza të rënda nga foltorja e Kuvendit.
Cudic kritikoi përpjekjen e Ramës për t'i "lënë fajin opozitës" për dështimin, duke thënë se një retorikë e tillë "është poshtëruese për viktimat".
Opozita akuzoi mazhorancën e kryesuar nga kryeministri Edi Rama për lidhje të ngushta me presidentin serb Aleksandar Vuçiç, i cili mohon gjenocidin edhe sot e kësaj dite.
Sali Berisha iu drejtua Kuvendit, i cili akuzoi shumicën e deputetëve se “votuan sipas urdhrit të Aleksandër Vuçiqit”.
“Shqipëria anti shqiptar të tillë si Edi Ramën nuk ka pasur kurrë. Ju shkelmuat mbi gjakun e 8 mijë burrave dhe fëmijëve te pafajshëm të Bosnjes. Votuat duke shkelmuar mbi jetën e mbi 100 mijë shqiptarëve në Kosovë. Po çfarë mund të presësh nga një trafikant, eskortë trafikantësh. Ç’mund të presësh nga skllavi i Aleksandër Vuçiç? si mund të silleni si kope? Si mund të bëni ju shqiptarë një votim të tillë. Berisha publikisht në Shqipëri dhe OKB ka qenë kundër embargos që penalizonte Kosovën”, ka thënë Berisha.
