Haziri: Vendimi i Qeverisë Kurti ia qet hijen e zezë Kosovës
Nënkryetari i LDK-së, Lutfi Haziri, pezullimin e lincnesës së Klan Kosovës e ka quajtur si vendimin më të turpshëm pasluftës.
Sipas Hazirit, ky vendim është marrë për t’i frikësuar gazetarët dhe mediat tjera. Ai ka vlerësuar se ky vendim do t’ia qet hijen e zezë Kosovës.
“Albin Kurti i 'ndryshimeve' vërtet po e ndryshon vendin, por për të keq. Qeveria Kurti sot mori vendimin më të turpshëm në historinë e Kosovës së pasluftës për ta mbyllur njërin prej televizioneve më të mëdha e më profesionale në vend, Klan Kosova”, ka shkruar Haziri.
“Ky vendim, përpos që përkthehet si sulm direkt ndaj lirisë së shprehjes e përpjekje e ulët për t’i disiplinuar gazetarët, ia qet hijen e zezë Kosovës në botë. Kosovarët janë popull evropian, por fatkeqësia më e madhe është se kanë qeverisje aziatike”, ka shkruar ai.
Tutje, ai ka shprehur mbeshtetjen për mediumin Klan Kosova.
“Në mbështetje të Klan Kosovës dhe secilit medium të lirë e të pavarur të Kosovës. Mediat kanë gjithmonë të drejtë. Kot e keni”
“Po e riktheksoj se dikush ka vdekur për këtë Republikë, për këtë Liri e për këtë Demokraci, që i ndërtuam me shumë mund e sakrifica, personale e familjare. Dikush është në burg e dikush në Kuvend të Republikës. Shtrohet pyetja, çka do të lini ju pas, kush feston për një ngjarje tuajen dhe para kujt me dërgu lule”, ka shkruar ai.
