Haxhiu bën fushatë duke sulmuar rëndë prokurorët: E lanë vetëm sot policinë, s’kanë vend në Prokurori

Sulme të rënda ndaj prokurorëve vendorë ka bërë gjatë fushatës zgjedhore, Ministrja e Drejtësisë, Albulena Haxhiu, në Podujevë, për të cilët thanë se “sot lanë vetëm Policinë e Kosovës” në një aksion qeveritar për mbylljen e disa zyreve të strukturave paralele serbe.

Haxhiu tha se “u çoj mesazh nga këtu” prokurorëve se “ata që nuk angazhohen do të japin përgjegjësi” dhe se “vendi i tyre nuk është në prokurori”.

“E përshëndesim policinë dhe ministrin Sveçla. Falemnderit policisë për këtë angazhim që s’e kemi parë asnjëherë më parë. Por, të dashur qytetar policia sot u la vetë nga policia, thanë që ne s’kemi dorë në mbylljen e këtyre strukturave”, tha Haxhiu.

“Por u çojmë mesazh, që ata prokurorë që nuk guxojnë le të shkojnë. Sepse vendi i tyre nuk është në prokurori, le të shkojnë në shpi, duhet me dhanë përgjegjësi. Do të angazhohemi maksimalisht, që të gjithë prokurorët që nuk angazhohen të japin përgjegjësi”, tha ajo.