“Duket si zonë lufte”: Zjarri më i rëndë në Spanjë lë mbi 50 mijë hektarë të djegur
Era e drurëve të djegur është e fortë dhe nuk po largohet. Nuk është për t’u befasuar. Pylli në jug të qytezës Cebreros, në provincën Avila të Spanjës, është shkatërruar tërësisht.
Zjarri “Burgohondo” – më i madhi që është regjistruar ndonjëherë në Spanjë pasi dogji mbi 50 mijë hektarë – ka shkatërruar gjithçka në rrugën e tij, raporton televizioni CNN.
Zjarri mbetet jashtë kontrollit, edhe pse zjarrfikësit po garojnë me kohën për ta frenuar. Kushtet mund të bëhen edhe më sfiduese të mërkurën, kur Spanja po përgatitet për valën e katërt të vapës këtë verë.
3.300 banorët e qytezës kanë qenë të ngujuar nga fundi i javës së kaluar për shkak të afërsisë së zjarrit.
“Ne kurrë nuk kemi parë diçka si kjo më parë. Duket si zonë lufte” – tha Kepa, i cili jeton në këtë qytezë për 19 vjet.
Ai po fliste në restorantin e tij të vogël në qendër të qytezës, të cilin më në fund mundi ta rihapte të martën, pasi autoritetet e kishin urdhëruar që ta mbante mbyllur gjatë ditëve të izolimit.
Kepa thotë se, ndonëse zona është mësuar me zjarre në natyrë kohë pas kohe gjatë verës, ai nuk kishte parë asnjëherë diçka të këtij niveli.
Duke qëndruar ulur afër tij, Vanesa thotë se nuk di nëse do të mund të kthehet në shtëpi. Ajo jeton në qytezën fqinje, El Tiemblo, rreth shtatë kilometra në jug. Edhe ky vendbanim është vendosur në izolim nga autoritetet.
“Vetëm po shpresoj që kjo të marrë fund sa më shpejt që është e mundshme” – tha ajo./Nacionale
