“Është djali i një taksisti”: 37 vjeçari që pritet të bëhet kryeministër i Irlandës

Simon Harris është nominuar sot për kryeministër të Irlandës, një nominim ky i përkrahur me 88 vota.

Siç raporton BBC, ai do të vijë në këtë pozitë pasi Leo Varadkar dha dorëheqje papritur gjatë muajit të kaluar.

Ai do të emërohet si kryeministër zyrtarisht nga presidenti Michael Higgins gjatë pasdites të së martës.

37 vjeçari është lideri më i ri i vendit ndonjëherë.

Kush është Simon Harris?

I madhi nga tre fëmijët, Harris është djali i një taksisti dhe i një asistente për njerëz me nevoja të veçanta.

Pasi shkoi në shkollë në Greystones, ai studioi gazetari dhe frëngjisht në Institutin e Teknologjisë në Dublin.

I zgjedhur për herë të parë këshilltar në vitin 2009, ai u zgjodh deputet në vitin 2011 në moshën 24 vjeçare.

Ai mori rolin e tij të parë në kabinet si Ministër i Shëndetësisë në vitin 2016, duke shërbyer më vonë në portofolet e arsimit të mëtejshëm dhe drejtësisë.

Harris jeton në zonën e tij elektorale me gruan e tij Caoimhe dhe dy fëmijët, duke e përshkruar prindërimin si "punën më të rëndësishme që ka dhe do ta ketë ndonjëherë".