Albulena Haxhiu në konferencë të jashtëzakonshme: Mbrëmë kuptuam se janë zhdukur mostrat e Astrit Deharit

Ministrja e Drejtësisë, Albulena Haxhiu, përmes një konference të jashtëzakonshme për medie, ka folur për rastin e Astrit Deharit dhe disa gjetjeve të reja që raporton se janë bërë prej mbrëmjes së kaluar.

Ajo tha se janë zhdukur disa mostra të ish-aktivistit të ndjerë të Vetëvendosjes, Astrit Dehari, nga Laboratori i Toksikologjisë, që funksionon në kuadër të Institutit të Mjekësisë Ligjore.

Raportimi i mëposhtëm është kronologjik.

Haxhiu ka bërë të ditur se qasje në vendin ku ruheshin epruvetat e rastit Dehari, kanë vetëm tre persona. Si rrjedhojë, ajo tha se mungojnë 12 epruveta me gjak, një e urinës dhe një e lukthit.

Për këtë çështje, ajo tha se i ka njoftuar prokurorinë e shtetit dhe policinë.

“Mbrëmë, në orët orët e vona, jam lajmëruar se janë zhdukur disa mostra nga laboratori i toksikologjisë, që funksionon në kuadër të Institutit të Mjekësisë Ligjore. Ky është një akt i rëndë e një akt kriminal. Për këtë arsye, mbrëmë i kanë njoftuar drejtorin e policisë dhe kryeprokurorin e shtetit. Neraksat-Mbajtëset e epruvetave kanë qenë 15 epruveta me gjak, një epruvetë e urinës dhe një e lukthit. Nga këto, instituti dy epruveta me gjak ia ka dhënë institutit zviceran. Sipas informacioneve, mungojnë 12 epruveta me gjak, një e urinës dhe një e lukthit. Në vendin ku ruhen epruvetat, kanë qasje vetëm tre persona”- ka thënë Haxhiu.

Ajo shtoi më tej se i di emrat e personave që kishin qasje në vendin ku ruheshin epruvetat.

“Unë i di emrat e personave që kanë qasje, por s’mund t’i them ata, sepse të njëjtit i dinë policia dhe prokuroria.”

Më tej, ministrja u shpreh që dyshon se kjo ka qenë e planifikuar, por se, megjithatë, “fjalën e fundit do ta thotë prokuroria.”

“Nuk jam eksperte që të tregoj se a e dëmton rastin apo jo, vetëm jam e thirrur të tregoj një gjendje faktike” – vazhdoi ajo.

Haxhiu tha se për një gjë të tillë ishte njoftuar nga udhëheqësja e Laboratorit të Toksikologjisë dhe se, në kohën kur ishte njoftuar, kishte qenë në koncert të Filarmonisë së Kosovës.

Tutje, ministrja Haxhiu ka deklaruar se ky “akt i rëndë është vërejtur dje gjatë bartjes së mostrave nga frigoriferët e vjetër në ata të rinj”.

“Ne besojmë se ky akt i rëndë e kriminal, që ka ndodhur në ambientet që do të duhej të ishin të mbrojtura e të sigurta brenda IML-së, ka për qëllim ta dëmtojë edhe më tutje këtë proces dhe të na veshë neve me përgjegjësi. Ky akt i rëndë është vërejtur dje gjatë bartjes së mostrave nga frigoriferët e vjetër në ata të rinj. Situata e krijuar është tepër e rëndë. Të vendosë hije dyshimi në gjithë IML-në, por edhe në veprimtarinë e tij”- tha ajo.

Sipas saj, vendi ku ruhen mostrat, është shumë strikt.

“Protokolli i vendit ku ruhen mostrat, është shumë strikt. Nëse ai ndiqet qartë, kuptohet se kush janë përgjegjësit për këtë krim”- ka deklaruar Haxhiu.

LAJMI NË PËRDITËSIM...