Albulena Haxhiu bëhet pak unifikuese, kërkon të respektohet Memli Krasniqi

Figura që nga partitë opozitare po konsiderohet si jounifikuese që të bëhet kryeparlamentare, Albulena Haxhiu, ka kërkuar që të respektohet kreu i Partisë Demokratike të Kosovës, Memli Krasniqi, derisa ky po fliste para mediave.

Haxhiu e cila po kalonte në hollin e Kuvendit në ato momente, u pyet prej larg nga gazetarët nëse do të jetë kandidatë për kryeparlamentare edhe sot.

Këtu, ajo u përgjigj duke thënë “respektojeni z.Krasniqi”.

“Mirë e ka përndryshe, merrja këshillën” – tha më pas Krasniqi, transmeton Nacionale.

Ndërkohë, pas takimit me liderin e VV-së, Krasniqi para gazetarëve e bëri të qartë se qëndrimet e partisë që ai drejton vazhdojnë të jenë të njëjta.

“Pak më parë përfundova takimin me kryetarin e VV-së, deputetin Albin Kurti, me të cilin kemi shkëmby ide dhe diskutime sa i përket konstituimit të Kuvendit të Kosovës. Qëndrimet janë ato që ju i dini, e kam thënë këtu para jush, ia thash edhe Kurtit përsëri, që për PDK-në është shumë me rëndësi që sa më shpejt të zhbllokohet kjo situatë, të konstituohet, e të hyret në afatet kushtetuese për zgjedhjen e Qeverisë së ardhshme” – tha fillimisht ai.