Alarmi për bombë në Kuvend i rremë, kryeprokurori Gashi: Kërcënuesi foli anglisht me theks të shteteve jomike
Kryeprokurori i Prokurorisë Themelore në Prishtinë, Zejnullah Gashi, ka bërë me dije se alarmi për bombë në Kuvend ka rezultuar të jetë i rrejshëm.
Duke dhënë detaje për rastin, ai ka thënë se kërcënimi është bërë nga një person mashkull, i cili ka folur në gjuhen angleze.
Në një konferencë për media, ai ka deklaruar se kërcënuesi ka folur një akcent të shteteve jo mike.
“Policia e Kosovës ka pranuar një njoftim nga zyrtarë të lartë të Kuvendit për një kërcënim me bombë. Gjitha njësitë policore kanë dalë në vendin e ngjarjes, duke përfshirë edhe Prokurorinë Themelore të Prishtinës. Ka rezultuar që kërcënimi ka qenë i rrejshëm”, ka thënë Gashi, duke dhënë detaje tjera.
“Deri më tani nuk ka diçka që ia vlen të ceket, sa i përket rezultateve. Patjetër se hetimet do të vazhdojmë sa i përket prejardhjes së kërcënimit, apo më mirë të themi, thirrjes telefonike të bërë nga një person anonim, i cili ka qenë me zë mashkulli, në gjuhën angleze, me një aksent që ne mendojmë që është i shteteve jo mike. Për momentin janë të gjithë këto informacione”, ka thënë Gashi.
Çka ndodhi sot?
Pak minuta para së të fillonte përpjekja e 42-të e deputetëve për konstituimin e Kuvendit të Kosovë, një zyrtare e Kuvendi kishte marrë një mesazh kërcënues për bombë në Kuvend.
Derisa deputetët po hynin në sallë, policia njoftoi deputetët dhe gazetarët që ishin në ndërtesën e Kuvendit që në mënyrë urgjente të largoheshin nga ndërtesa e Kuvendit.
Më pas, Policia e Kosovës e ka konfirmuar kërcënimin me bombë në Kuvendit e Kosovës.
Përmes një reagimi, policia ka treguar se kërcënimi ka ardhur në orët e paradites përmes një mesazhi telefonik.
“Sot, me datë 05.07.2025 në orët e paradites, është pranuar një informatë (me sms), për një kërcënim me mjet shpërthyes në objektin shtetëror të RKS-së. Me të pranuar informatën, janë angazhuar njësitë kompetente policore, të cilat fillimisht kanë bërë perimetrin e sigurisë dhe kanë evakuuar personat nga objektet”, është thënë në njoftimin e Policisë së Kosovës.
Më tej, policia ka treguar në lidhje me rastin ka njoftuar edhe prokurorinë.
“Policia e Kosovës ka njoftuar prokurorinë kompetente dhe hetuesit policorë të cilët së bashku me njësitë dhe ekspertët përkatës për deminim, janë duke marrë veprimet e duhura të kontrollit në objekt”, është thënë në njoftimin e Policisë.
Tentativa e 42-të e deputetëve për konstituimin e Kuvendit do të mbahet sot në ora 20:00.
