AGK reagon ndaj montazhës kundër gazetarëve: Fushatë e rrezikshme
Asociacioni i Gazetarëve të Kosovës ka reaguar për disa fotomontazhe të bëra ndaj gazetarëve.
Duke e cilësuar si fushatë të rrezikshme, AGK ka njoftuar se cak i këtyre sulmeve janë gazetarët, Berat Buzhala, Bekim Kabashi dhe Lavdim Hamidi.
AGK ka thënë se një fushatë e tillë është shumë e rrezikshme dhe vë në cak sulmet online ndaj gazetarëve dhe familjarëve të tyre.
Asociacioni i Gazetarëve ka bërë thirrje që fushatat e tilla denigruese të ndalen.
Reagimi i AGK-së:
Fushatë e rrezikshme me fotomontazhe ndaj gazetarëve
Berat Buzhala, Bekim Kabashi dhe Lavdim Hamidi, janë bërë cak i foto-montazheve, të cilat po shpërndahen në rrjete sociale këtë pasdite.
Foto-montazha e Buzhalës është krijuar në atë formë që të duket gjoja se presidenti i Serbisë, Aleksandar Vuçiq, e ka ripostuar një cicërimë të Buzhalës, duke thënë se është njëri nga gazetarët më të mirë kosovar. Ndërsa, Kabashit dhe Hamidit, u janë vendosur flamuj të Serbisë në ballë me mbishkrimet: “Zagarët e Vuciqit”, si dhe “Bravo vëlla” (duke aluduar se kështu po iu drejtohet presidenti Serb dy gazetarëve).
Një fushatë e tillë, është shumë e rrezikshme dhe vë në cak të sulmeve online si gazetarët, ashtu edhe familjet e tyre.
Asociacioni i Gazetarëve të Kosovës bën thirrje që fushatat e tilla denigruese të ndalen, në mënyrë që mediat të kenë mundësi të ushtrojnë profesionin e tyre pa u penguar.
