Abazoviq kërkon që takimi i radhës Kurti-Vuçiq të mbahet në Mal të Zi

Kryeministri në detyrë i Malit të Zi, Dritan Abazoviq, ka kërkuar që Mali i Zi të jetë vendi i takimit të radhës në mes të kryeministrit Albin Kurti dhe presidentit të Serbisë, Aleksander Vuçiq.

Pas takimit me kryeministrin Albin Kurti, ai në llogarinë e tij në “Twitter”, ka shkruar se Mali i Zi është i gatshëm të jetë vend mikëpritës i rundit të ardhshëm të takimit, i cili pritet të ndodh javën e ardhshme.

“Interesi ynë i përbashkët është të gjejmë një zgjidhje të pranueshme për të gjitha palët në një bisedë të hapur“, ka shkruar ai.

Ai ka vlerësuar se promovimi i paqes, stabilitetit dhe bashkëpunimit rajonal është një nga synimet kryesore të politikës së jashtme të Malit të Zi.

Abazoviq ka takuar kryeministrin Kurti në kuadër të Forumit të Prespës që po zhvillohet në Ohër të Maqedonisë së Veriut.