Koha për Sahatin
Po ju sjellim një intervistë nga Suzanne Podcast (sezoni i dytë i së cilës do të emetohet së shpejti në T7) me Lisa Sahatçiun, një yll muzikor në ngritje që ka lindur në Prishtinë por jeton në Kanada, ku po bën muzikë me nofkën Sahati. Është interesant fakti që muzicientja e re shqiptaro-kanadeze vjen nga familja Sahatçiu, prej nga tashmë ka dale edhe ikona botërore Rita Ora.
Lisa Sahatçiu AKA Sahati jeton në Toronton e ftohtë të Kanadasë dhe padyshim ka një sens të ngrohtë arti. Ajo luan disa instrumente, ka publikuar një numër këngësh dhe këtë po lëshon videon e saj më të fundit, e cila është një miks i fuqishëm drum&bass dhe reggaeton, “Again Again” (këtu mund ta dëgjoni versionin audio në Spotify). Ajo rrezaton një vetëbesim të qetë, përçon shpirtin urban si në stilin ashtu edhe në deklaratat e saj - kështu që menduam se është një kandidate perfekte për platformën tonë të publikimit, për një lloj të ri intervistash që po lancojmë të quajtura TenTen.
Pra, pa zvarritje të mëtejshme, këtu janë dhjetë përgjigjet e Sahat-it për dhjetë pyetjet tona:
- Për çfarë është kënga juaj e re?
‘Again Again’ në thelb ka të bëjë me të qenit një "baddie" dhe përgjegjësitë që vijnë me të qenit në një lidhje me një "baddie". Shumë njerëz e fantazojnë të jenë me vajzën e tyre të ëndrrave, por kur marrin mundësinë, nuk dinë si të sillen. Kjo është një thirrje zyrtare për të trajtuar gruan tuaj si duhet.
- Duhet të pyesim, emri juaj artistik është Sahati, që do të thotë "ora". Mbiemri i Rita Ora gjithashtu ka një kuptim të ngjashëm. A është e vërtetë që jeni të afërm?
Haha, po, kjo është e saktë, gjyshërit tanë ishin vëllezër dhe mendoj se ata e kanë kaluar gjenin artistik te të gjithë ne.
- Pyetja e radhës natyrshëm është, çfarë ju shqetëson në lidhje me kalimin e kohës?
Më shqetëson presioni për të rënë në një normalitet apo “normalizëm” shoqëror, sapo të arrish një moshë të caktuar. Më entuziazmon të shoh njerëz mbi moshën 50 vjeç që ende eksperimentojnë me pamjen, idetë, stilin e tyre dhe janë të hapur për gjëra të reja. Shpresoj të jem edhe më shumë e tillë ndërsa rritem.
- Cila është kënga në gjuhën shqipe që flet më mirë për brezin tuaj?
Mamës - Supersonic.
- Cili është koncerti i parë që keni ndjekur, dhe cili është koncerti i parë ku keni luajtur?
Mendoj se koncerti i parë në të cilin kam qenë ishte ndoshta një koncert klasik në Sallën e Kuqe në Prishtinë, prindërit e mi shpesh më merrnin mua dhe motrën atje gjatë rritjes. Si një nxënëse e pianos klasike në Prenk Jakova për 9 vite, gjëja e fundit që doja të bëja ishte të ndiqja më shumë koncerte klasike. Por tani jam mirënjohëse dhe ndjej ndikimin e tij ndërsa kompozoj sot. Koncerti i parë ku kam luajtur duhet të ketë qenë kur isha 6 ose 7 vjeç, për një recital pianoje, por koncerti i parë si Sahati ishte në Vancouver Mural Festival në Kanada, që ishte jashtëzakonisht emocionues për mua.
- Cilat janë rreshtat e parë të këngës së fundit që keni shkruar në bllokun tuaj të shënimeve?
“Shiko më shiko më të gjithë mua dua gjithçka”
- Me çfarë ose kë jeni e fiksuar?
Jam aq e fiksuar pas krelanës. Është pjatë ime e preferuar që nga fëmijëria dhe e shijoj sa herë që kthehem në shtëpi, edhe pse nuk është më e ushqyeshmja. Sa për njerëzit, jam e fiksuar pas Rosalia, Linda (@Serpentclaws), Lui$a, Gala Dragot, FKA Twigs, i dashuri im, Yaeji dhe të gjitha gratë në jetën time.
- A jeni person dimri apo vere?
Vera gjatë gjithë vitit është ëndrra.
- Cili është instrumenti i parë që keni mësuar të luani dhe cili është ai që ju pëlqen më shumë?
Së pari kam mësuar të luaj def, pastaj piano, daulle, bas dhe kitarë. Deri tani, daullet mbeten të preferuarat e mia dhe padyshim që dua të rikthehem për të luajtur me artistë të tjerë gjithashtu.
- A ma mirë këtu a atje?
Gjithçka që bëj e bëj për këtu. Por ndonjëherë është më mirë atje.
Intervista origjinale:
