Vuçiq nga Sllovenia: Nuk pati tensione, veç qëndrime të ndryshme për Kosovën
Në një konferencë të mbajtur për media në Slloveni, presidenti serb Aleksandar Vuçiq ka thënë se nuk ka pasur tensione në samitin për procesin e Brdo Brionit.
Sipas B92, Vuçiq ka thënë se në këtë takim ka pasur qëndrime të ndryshme nga presidentët e shteteve ballkanike për Kosovën, por jo edhe tensione.
” Bisedimet kanë shkuar normalisht, nuk ka pasur tensione. Qëndrimi ynë rreth Kosovës është i ndryshëm nga qëndrimi i vendeve të tjera, me përjashtim të përfaqësuesve serbë në Bosnje dhe Hercegovinë”, ka thënë Vuçiq.
Ai më tej ka njoftuar se është folur edhe për situatën e vështirë energjetike dhe mënyrat e ndihmës së BE-së për Ballkanin Perëndimor.
“Ne folëm edhe për 6 pika me theksin se BE-ja duhet të ndihmojë Ballkanin Perëndimor nëse mundet në situatën e vështirë energjetike në të cilën ndodhemi të gjithë” është shprehur Vuçiq.
