Vidovdani: Policia e Kosovës raportohet se ka arrestuar një person në Graçanicë
Policia e Kosovës ka arrestuar në Graçanicë V.P., organizatorin e një udhëtimi pelegrinazhi nga Beogradi.
Grupi që ai udhëhoqi mbante bluza me mesazhe politike të lexueshme “Serbia e Bashkuar”, si dhe ngjyrat kuq, kaltër dhe bardhë.
Ndalimi i V.P. është realizuar në praninë e pjesëtarëve të KFOR-it dhe Inspektoratit Policor, sipas raportimeve nga Kossev.
Komandanti i stacionit policor në Graçanicë, Bratislav Trajkoviq, refuzoi të japë detaje për mediat mbi arsyet e ndalimit të V.P.-së, duke i drejtuar të gjithë gazetarët te zyra për media e Policisë së Kosovës.
Sipas raportimeve të gazetarëve të Radio Kim që janë në terren, forca të shtuara të Policisë së Kosovës dhe pjesëtarë të KFOR-it janë të pranishëm në Graçanicë, të shpërndarë në disa pika me automjete.
