Tre të vdekur nga orteku në një qendër skijimi në Zvicër
Një ortek në majë të qendrës së skijimit në Zermatt të Zvicrës, afër kufirit me Italinë, ka lënë të vdekur tre persona e një të lënduar. Autoritetet paralajmëruan për rrezik për fatkeqësi të reja për shkak të erës së fortë e reshjeve të borës.
Në pamje të publikuara në rrjete sociale shihet një mur bore duke kapërcyer një pjesë jashtë shtegut të sektorit Riffelberg të Zermatt-it, njëra nga qendrat më luksoze të skijimit në Alpet e Zvicrës. Një operacion i gjerë shpëtimi u nis pavarësisht nga moti i lig, raporton gazeta “The Guardian”.
Kërkimi u pezullua në mbrëmje, tha në rrjetin X kantoni Valais, duke konfirmuar se tre persona kishin vdekur e një tjetër ishte lënduar.
Reshjet e dendura të borës dhe era shumë e fuqishme i kishte nxitur autoritetet që të paralajmëronin për rrezikun e një orteku të madh në pjesën jugore të Alpeve.
Rreziku vlerësohej posaçërisht i lartë në kantonet Grison dhe Valais, të dyja destinacione të popullarizuara për skijim.
“Priten ortekë shumë të mëdhenj dhe në disa raste tepër të mëdhenj e spontanë” – tha Instituti për Hulumtimin e Borës dhe Ortekëve.
Para së hënës, 14 persona kishin vdekur nga 12 ortekë e aksidente në Zvicër deri më tani në këtë sezon skijimi, sipas këtij instituti.
