Sulmohet një infermier në QKUK, reagon Sindikata e Punëtorëve Shëndetësorë

Sindikata e Punëtorëve Shëndetësorë të QKUK-së ka bërë të ditur se një infermier në Klinikën e Onkologjisë është sulmuar derisa ishte në vendin e punës.

Kjo sindikatë, përmes një reagimi të publikuar në Facebook, ka dënuar ashpër sulmin ndaj infermierit, për të cilin thanë se po kryente detyrën zyrtare në shërbim të pacientëve.

“Sulmet e tilla ndaj punëtorëve shëndetësorë në vendet e tyre të punës janë shqetësuese dhe të pa pranueshme, ndërsa tolerimi i tyre krijon precedent të rrezikshëm për të ardhmen duke nxitur pasiguri në punë në mesin e komunitetit infermieror”, thuhet tutje në komunikatë.

Në fund, i është bërë thirrje QKUK-së që të rrisë kapacitetet dhe masat e sigurisë fizike për punëtorët në vendin e punës, ndërsa organet të zbardhin rastin.

Reagimi i plotë:

REAGIM NDAJ SULMIT FIZIK NDAJ INFERMIERIT

Prishtinë, 10/10/2022

Sindikata e Punëtorëve Shëndetësor të QKUK-së dënon ashpër sulmin fizik ndaj infermierit në Klinikën e Onkologjisë në QKUK, i cili ishte në vendin e tij punës dhe po kryente detyrën zyrtare, në shërbim të pacientëve.

Sulmet e tilla ndaj punëtorëve shëndetësorë në vendet e tyre të punës janë shqetësuese dhe të pa pranueshme, ndërsa tolerimi i tyre krijon precedent të rrezikshëm për të ardhmen duke nxitur pasiguri në punë në mesin e komunitetit infermieror.

Ftojmë QKUK të rrisë kapacietet dhe masat e sigurisë fizike për punëtorët shëndetësor në vendet e tyre të punës, ndërsa organet kompetente që të zbardhin rastin dhe kryesit e kësaj veprave frikacake dhe të turpshme të marrin dënimin e merituar, në mënyrë që rastet e tilla të mos përseriten më.