Sulmi me bombë ndaj manjatit ukrainas në Monako, u krye nga një grua
Një shpërthim me bombë në Monako më 29 qershor ka tronditur principatën e njohur për siguri të lartë, duke lënë të plagosur tre persona, përfshirë një biznesmen të pasur me origjinë ukrainase. Autoritetet po e trajtojnë rastin si tentativë vrasjeje, ndërsa hetimet po zgjerohen.
Nga shpërthimi u plagosën Vadym Iermolaiev, partnerja e tij dhe djali i tyre. Dy prej tyre kanë pësuar lëndime të rënda.
Fillimisht u dyshua për një autor mashkull, por pamjet e kamerave të sigurisë dhe hetimet policore kanë çuar në identifikimin e një gruaje si të dyshuarën kryesore. Sipas autoriteteve, ajo është Anastasiia Berezovska, 39 vjeçe, shtetase e Ukrainës, ndaj së cilës është lëshuar urdhër-arrest ndërkombëtar.
Pas sulmit, e dyshuara iku në Francën fqinje, pastaj u drejtua për në Itali me një makinë me targa gjermane të marrë me qira për operacionin, shtuan prokurorët.
Autoritetet e Monakos nuk kanë konfirmuar zyrtarisht identitetin e viktimave, por sipas burimeve, objektivi kryesor ka qenë Vadym Iermolaiev, 58 vjeç, biznesmen me origjinë ukrainase dhe shtetas i Qipros, së bashku me familjen e tij.
Gjendja e tij shëndetësore raportohet të jetë stabilizuar dhe jo më kërcënuese për jetën, ndërsa partnerja e tij mbetet në gjendje të paqëndrueshme.
Iermolaiev, i vendosur në Monako që nga viti 2021, është nën sanksione të vendosura nga Ukraina që nga dhjetori i vitit 2023, për shkak të aktivitetit të tij të biznesit në Krimenë e aneksuar nga Rusia.
Sipas autoriteteve në Kiev, ai ka qenë i përfshirë në një kompani të prodhimit të alkoolit në Krime dhe dyshohet se ka vazhduar aktivitet ekonomik dhe pagesa tatimore në Rusi edhe pas nisjes së pushtimit në vitin 2022.
