“Sot vi me shkop, por vi çdo vit”: Walker në 25 vjetorin e Masakrën e Reçakut e kujton ngjarjen

Njeriu që evidentoi dhe i dha zë në mbarë botën asaj që po ngjante në Kosovë, asokohe Shef i Misionit Verifikues të OSBE-së në Kosovë, William Walker, edhe sivjet kreu homazhe në Reçak të Shtimes – 25 vite pasi para të gjithë botës deklaroi se ajo çfarë kishte parë në Reçak ishte “krim kundër njerëzimit”; gjë që edhe do të shënonte pikëkthesën historike të Aleancës së Atlantikut të Veriut drejt bombardimit të Serbisë së udhëhequr nga Sllobodan Millosheviqi.

“Kjo nuk është vizita ime e parë në Reçak, mendoj se është e 21, 22 apo 23. Unë vij të nderoj fshatin Reçak, vij të përshëndes miqtë e mi, familje nga fshati Reçak, disa prej tyre i njoh prej 25 vitesh, disa fatkeqësisht kanë ndërruar jetë. Kjo është hera e parë që duhet të vij me shkop, por prapë dua të jem në Reçak në çdo rast që mundem. Për mua është shumë emocionuese”, ka thënë Walker para gazetarëve.