ShBA u përgjigjet me kujdes raportimeve për raketa ruse në Poloni
Raportimeve se në territorin polak kanë rënë raketa ruse, amerikanët u janë përgjigjur me shumë kujdes.
Shtëpia e Bardhë, Pentagoni dhe Departamenti i Shtetit, kanë thënë se nuk mund të konfirmojnë atë që ka ndodhur dhe se janë duke punuar me qeverinë polake për të mbledhur më shumë informacion.
Ata gjithashtu kanë përsëritur angazhimin e Amerikës për të mbrojtur çdo pëllëmbë të territorit të NATO-s nëse sulmohet, diçka që presidenti Joe Biden e ka quajtur një "detyrim të shenjtë".
Por, siç duket deri më tani as ShBA dhe as aleatët e saj në NATO nuk kanë dashur të tërhiqen në një konfrontim të drejtpërdrejtë me Rusinë.
Departamenti i Shtetit tha se qëllimi do të ishte një faktor në përcaktimin e hapave të ardhshëm.
Ndërsa, Kurt Volker, një ish i dërguar i posaçëm i ShBA-së për Ukrainën, ka thënë për BBC-në, se ishte shumë e rëndësishme të vërtetohej nëse ndonjë sulm raketor në territorin polak kishte qenë i qëllimshëm apo aksidental.
Ai ka shtuar se, NATO-ja duhet të kërkojë një shpjegim të qartë nga Rusia, dhe nëse një raketë ka humbur rrugën, të ndërmarrë hapa për t'u siguruar që nuk do të ndodhë më.
