Reagimet e forta detyrojnë FIFA-n të tërhiqet nga plani për Kupën e Botës
FIFA ka hequr dorë nga plani i propozuar për të shitur aksione private në turnetë e ardhshëm të Kupës së Botës, një nismë që shkaktoi reagime të ashpra nga tifozët dhe federatat e futbollit në mbarë botën. Këtë e bëri të ditur të premten presidenti i FIFA-s, Gianni Infantino, përmes një deklarate.
“Pasi dëgjuam me kujdes të gjitha qëndrimet, u bë e qartë se ky projekt ka krijuar ndarje të tilla që, pavarësisht nivelit të mbështetjes, nuk janë më në interes të objektivit që kishim vendosur fillimisht,” tha Infantino.
“Qëllimi ynë ka qenë gjithmonë – dhe do të jetë gjithmonë – të bashkojmë dhe të përmirësojmë.”
“Si rezultat, ky propozim nuk do të zbatohet.”
FIFA dhe Infantino kishin njoftuar të martën planet për krijimin e një filiali të veçantë – me përfshirjen e investimeve nga fondet private të kapitalit – i cili do të kontrollonte të drejtat komerciale dhe operative të njërit prej ngjarjeve më të mëdha sportive në botë.
Propozimi u përball me shqyrtim të ashpër dhe kritika nga shumë vende dhe organizata, ndërsa UEFA deklaroi se “shpirti dhe qeverisja” e futbollit janë vënë në rrezik. Megjithatë, FIFA këmbënguli se të ardhurat e gjeneruara nga kjo nismë do të riinvestoheshin në zhvillimin e futbollit.
