Qeveria deklarohet për takimin Kurti-Sarrazin: Kosova është angazhuar plotësisht në Procesin e Berlinit
Qeveria e Kosovës ka dhënë detaje mbi takimin e kryeministrit Albin Kurti me emisarin gjerman për Ballkanin Perëndimor, Manuel Sarrazin.
Sipas Zyrës së Kryeministrit, në takim është diskutuar për Procesin e Berlinit dhe për samitin e radhës.
“Kryeministri theksoi që në kohën kur në rajon shtyheshin platforma të tjera paralele, Kosova është angazhuar plotësisht në Procesin e Berlinit duke kërkuar ri-energjizimin dhe fuqizimin e tij si një platformë që ofron barazi dhe përshpejton procesin e anëtarësimit në Bashkimin Evropian për vendet që duan të anëtarësohen.” – thuhet në njoftim.
Tutje, Qeveria ka thënë se “është e rëndësishme që para samitit të radhës të arrijmë jo vetëm marrëveshje të reja por edhe të sigurojmë zbatimin e marrëveshjeve që tashmë kemi nënshkruar…”.
