Peci del në terren pasi u dogj një bager që po rrënonte ndërtime pa leje: Akt makabër dhe qyqar
Akt makabër dhe qyqar, e ka quajtur Faton Peci, Kryetar i Mitrovicës së jugut, pas djegies së një bageri gjatë orëve të mbrëmjes, makinë kjo e cila po rrënonte objekte pa leje me urdhër të komunës.
Peci e quajti veprim kriminal dhe kërëcnim ndaj rendit dhe qetësisë publike.
Postimi i plotë:
Nuk po rrënon bageri, po rrenon kryetari Faton Peci
Te dashur qytetarë,
Mbrëmë gjatë orëve të vona të natës, kompanisë që ishte përgjegjëse për rrënimin dhe largimin e objekteve pa leje i është djegur një mekanizëm/bager.
E dënoj ashpër këtë akt makabër e qyqar. Ky veprim kriminal përbën kërcënim direkt për të gjithë ata që angazhohen që Mitrovica të jetë qytet ku mbretëron rendi dhe qetësia publike.
Por, të gjithë ata që me akte të tilla kriminale e kërcënuese mendojnë se na frikësojnë e kanë gabim. Lufta jonë ndaj paligjshmërisë, kriminalitetit e parregullësisë nuk do të ndalet. Në anën tjetër, organeve të rendit ju bëj thirrje të intesifikojnë veprimet e tyre për zbardhjen sa më të shpejtë të rastit.
E për të gjithë ata me këtë logjikë dua t’i siguroj se paqe me krimin nuk do të ketë asnjëherë, askund në Mitrovicë, as në jug as në veri.
