Një i vdekur nga malaria në Aeroportin e Frankfurtit, pesë punonjës të tjerë të infektuar
Një punonjës i Aeroportit të Frankfurtit ka vdekur pasi është infektuar me malarie, ndërsa pesë punonjës të tjerë janë diagnostikuar me këtë sëmundje dhe po marrin trajtim mjekësor.
Sipas operatorit të aeroportit, Fraport, dyshohet se infeksionet janë shkaktuar nga një mushkonjë e infektuar që mund të ketë mbërritur në Gjermani me avion nga një zonë ku malaria është endemike, me gjasë gjatë muajit korrik, ka raportuar euronews.
Autoritetet kanë vendosur kurthe për mushkonjat në aeroport, ndërsa insektet e kapura do të dërgohen në laborator për ekzaminim.
Fraport u ka bërë thirrje punonjësve që të kërkojnë ndihmë mjekësore nëse shfaqin simptoma të ngjashme me malarien dhe të njoftojnë mjekët se punojnë në aeroport.
Instituti Robert Koch e ka cilësuar transmetimin e malaries në këtë mënyrë si shumë të rrallë. Sipas autoriteteve shëndetësore, transmetimi nga personi te personi nuk luan rol në të ashtuquajturën “malarie e aeroportit”.
Një studim që ka analizuar rastet e malaries së transmetuar përmes aeroporteve ose bagazheve në Evropë nga viti 1969 deri më 2024 ka identifikuar 145 raste, nëntë prej të cilave në Gjermani.
