Muharremi: Bllokada nuk është sfida jonë kryesore, në Kosovë askush nuk po flet për ide zhvillimore
Analisti Shenoll Muharremi ka bërë me dije se kriza politike nuk është sfida kryesore me të cilën përballet Kosova.
Ai ka vlerësuar se problemi më i madh është që shoqëria kosovare nuk po flet për ide zhvillimore, për zgjidhje sektoriale dhe për të ardhmen e vendit.
Sipas tij, është gabim që krejt diskursi të përqendrohet te partitë dhe individët.
“Përndryshe, bllokada dhe kriza aktuale politike nuk janë sfida jonë kryesore. Problemi i madh është që ne nuk po flasim për ide zhvillimi, për zgjidhje sektoriale e për të ardhmen tonë, por krejt diskursi është i përqendruar te partitë e individët. A ka mundësi që nuk kemi interes për të ardhmen që duhet ta ndërtojmë vetë (kësaj radhe), sepse ende nuk po tregojmë se kemi kapacitete me ndërtu si duhet? Prandaj po humbim kohë duke folë për njerëz dhe për politikën në formën më primitive”, ka shkruar ai në profilin e tij në “Facebook”.
Ai ka paralajmëruar se mungesë të ideve do të ketë edhe kur të përfundon kriza.
“Edhe kur të zgjidhet kjo krizë aktuale politike, që me siguri do të ndodhë muajt e ardhshëm, ne përsëri nuk do të kemi shumë ide se si me e zgjidh sfidën e energjisë, si me e orientu e fokusu ekonominë tonë. Ende nuk po diskutojmë seriozisht, nuk e dimë kah po shkojmë e çka duam të jemi vitet e dekadat e ardhshme. Asnjë debat substancial deri tash. Përderisa kryefjala e debatit mbetet për parti e individë, e jo për procese që e zhbllokojnë potencialin tonë si shoqëri, që e forcojnë vendin dhe sjellin prosperitet, ne jemi pa zgjidhje e pa ide. Sa më shpejt që të fillojmë me folë për atë që duhet bërë, aq më shpejt partitë dhe individët do të mbesin pjesë e historisë, e idetë dhe e ardhmëria do ta marrin vendin kryesor”, ka shkruar Muharremi.
