Më shumë se 200 të vdekur nga shembja e minierës në RD të Kongos

Më shumë se 200 persona kanë humbur jetën nga shembja e një miniere në lindje të Republikës Demokratike të Kongos, raporton BBC.

Miniera, në qytetin Rubaya, u shemb të mërkurën për shkak të reshjeve të dendura të shiut, tha për gazetarët Lumumba Kambere Muyisa, zëdhënës i guvernatorit rebel të rajonit North Kivu. Në atë kohë, numri i saktë i viktimave mbetej i paqartë.

Sipas BBC, gra dhe fëmijë ishin mes atyre që po nxirrnin koltan – një mineral që përdoret për prodhimin e pajisjeve elektronike si telefonat inteligjentë dhe kompjuterët – në atë moment.

Një ish–mbikëqyrës i minierës i tha BBC-së se vendi i punës nuk mirëmbajej siç duhet, gjë që e bënte më të mundshme aksidentin dhe pengonte përpjekjet e shpëtimit kur ato nevojiteshin.

Ai shtoi se natyra e brishtë e tokës e përkeqësoi edhe më shumë situatën.