Kurti për Al Jazeera : Askush nuk mund ta ndalojë Policinë e Kosovës të shkojë në veri
Në një intervistë për mediumin Al Jazeera, kryeministri i Kosovës ka thënë se askush mund ta ndalojë Policinë Speciale të Kosovës që të shkojë në veri.
Kryeministri ka theksuar se pjesa veriore e Mitrovicës është pjesë e Kosovës dhe se sipas tij, nuk ka pasur asnjëherë më shumë sundim të ligjit se sa gjatë qeverisjes së tij.
Kurti tha poashtu se pengimi i lëvizjes së lirë, nuk është asnjëherë zgjidhje.
“Dje jam takuar me gjeneralin [Ferenc] Kajari [komandantin e KFOR-it], po ashtu edhe me policinë tonë dhe EULEX-in. Barrikadat nuk janë zgjidhje. Ka një mekanizëm shtetëror që do të reagojë, nuk është vetëm policia, por edhe forcat speciale të policisë dhe askush nuk mund ta ndalojë policinë speciale që të vijë në veri. Veriu i Kosovës është pjesë e Kosovës, ndodhet në Kosovë dhe nuk ka pasur kurrë më shumë sundim të ligjit në veri të Kosovës sesa tani”, tha Kurti”, ka deklaruar kryeministri i Kosovës.
Të mërkurën e 24 gushtit, Zyra e Kryeministrit ka njoftuar se kryeministri i Kosovës, Albin Kurti, së bashku me ministrin e Punëve të Brendshme, Xhelal Sveçla kanë pritur në takim komandantin e Forcave paqeruajtëse të NATO-s në Kosovë (KFOR), Gjeneral Major Ferenc Kajári.
Në këtë takim është theksuar angazhim dhe koordinim ndërmjet qeverisë, institucioneve të Republikës së Kosovës dhe Forcave paqeruajtëse të NATO-s në Kosovë (KFOR) për garantimin e sigurisë dhe lëvizjen e lirë.
