KESCO kërkoi shtrenjtim të energjisë për 21%, PDK: "Goditje e rëndë për familjet kosovare"
Partia Demokratike e Kosovës ka reaguar ashpër ndaj paralajmërimeve për rritjen e tarifave të energjisë elektrike deri në 21%. Përmes një komunikate zyrtare, kjo parti e ka cilësuar propozimin si një barrë të papërballueshme që rrezikon mirëqenien sociale.
Sipas PDK-së, kjo rritje vjen në një moment kritik kur qytetarët po përballen me kosto të lartë jetese. "Një rritje e tillë e tarifave të energjisë e thellon edhe më tej krizën sociale dhe ekonomike në vend," thuhet në reagim, duke theksuar se shumë familje janë buzë mbijetesës.
Opozita e konsideron të papranueshme që dështimet e menaxhimit të faturohen te konsumatori. "PDK-ja e konsideron të papranueshme çdo përpjekje për ta transferuar barrën e keqmenaxhimit dhe dështimeve në sektorin e energjisë mbi qytetarët tanë," deklaron partia.
Në mbyllje, PDK i ka bërë thirrje Qeverisë dhe ZRRE-së që të refuzojnë këtë kërkesë, duke u zotuar për zbardhjen e aferave në sektorin energjetik dhe mbrojtjen e interesit publik.
Komunikata e plotë:
Partia Demokratike e Kosovës shpreh shqetësimin dhe kundërshtimin e saj ndaj paralajmërimeve për një rritje të re të tarifave të energjisë elektrike deri në 21 për qind, duke e konsideruar këtë si goditje të rëndë ndaj familjeve kosovare.
Në një kohë kur qytetarët tanë po përballen me rritje të vazhdueshme të çmimeve, paga të ulëta dhe kosto jetese gjithnjë e më të lartë, një rritje e tillë e tarifave të energjisë e thellon edhe më tej krizën sociale dhe ekonomike në vend.
Shumë familje në vendin tonë tashmë janë në kufijtë e mbijetesës financiare, ndërsa ky vendim do të sillte pasiguri shtesë, rritje të varfërisë dhe cenim serioz të mirëqenies së tyre.
Partia Demokratike e Kosovës e konsideron të papranueshme çdo përpjekje për ta transferuar barrën e keqmenaxhimit dhe dështimeve në sektorin e energjisë mbi qytetarët tanë. Energjia elektrike është një nevojë bazike dhe trajtimi i saj si e tillë është detyrim institucional.
Për këto arsye, PDK-ja kundërshton fuqishëm çdo propozim për rritje të tarifave të energjisë elektrike dhe u bën thirrje Qeverisë së Kosovës dhe Zyrës së Rregullatorit për Energji, që t'i refuzojnë këto kërkesa dhe të veprojnë në mbrojtje të interesit publik dhe të qytetarëve të Kosovës.
Partia Demokratike e Kosovës do të vazhdojë me angazhimin e saj për zbardhjen e aferave në sektorin e energjisë, për rritjen e llogaridhënies institucionale dhe për mbrojtjen e qytetarëve nga politika që rëndojnë jetën e tyre të përditshme.
