Katër të lënduar rëndë nga rrufeja afër Shtëpisë së Bardhë

Katër persona janë lënduar rëndë nga rrufeja që goditi një zonë afër Shtëpisë së Bardhë në ShBA.

Dy burrat dhe dy gratë e lënduara ishin në Parkun “Lafayette” në Washington DC gjatë një stuhie të fuqishme, kur u goditën nga rrufeja, thanë zjarrfikësit.

Për shkak të afërsisë së parkut me presidencën amerikane, pjesëtarët e shërbimit sekret ishin në mesin e personave të parë që u dolën në ndihmë të lënduarve.

Identiteti i personave të lënduar nuk është konfirmuar. Rrufeja i goditi ata afër një druri dhe afër rrethojës që e rrethon kompleksin e Shtëpisë së Bardhë të enjten në mbrëmje.

Pas incidentit, një pjesë e parkut u mbajt e mbyllur, ndërsa shërbimet emergjente ishin në vendin e ngjarjes.