Ish-drejtori i Policisë: Albulena Haxhiu tani do të duhej të ishte ish-ministre e Drejtësisë
Katër zyrtarë të Institutit të Mjekësisë Ligjore janë pezulluar nga puna pas zhdukjes së mostrave të aktivistit të ndjerë të Lëvizjes Vetëvendosje, Astrit Dehari.
Ndërkaq, deputeti i Partisë Demokratike të Kosovës, njëherit ish-drejtor i Policisë, Rashit Qalaj e ka fajësuar edhe ministrinë e Drejtësisë, duke thënë se Albulena Haxhiu do të duhej dorëhequr tani nga pozita e ministres.
“Po të ishte një ministre që mendon pozitivisht, nuk do të kishim folur se a duhet të jep dorëheqje, kjo punë do të duhej kryer. Opozitarët e atëhershëm, gjithmonë kanë akuzuar krerët e institucioneve, duke kërkuar hetime penale ndaj tyre, ky rast duhet të trajtohet njëjtë. Zonja Haxhiu do të duhej të ishte ish-ministre e Drejtësisë në këtë rast.” – ka thënë ai në RTV Dukagjini.
Ndërkaq, zyrtarët e pezulluar janë:
Nardi Sheqergjiu, Toksikolog Mjekoligjor në Institutin për Mjekësi Ligjore
Flutura Goga, Udhëheqëse e Laboratorit të Toksikologjisë në Institutin për Mjekësi Ligjore
Anila Lakna, Teknike e Laboratorit të Toksikologjisë në Institutin për Mjekësi Ligjore
Ilirjana Shala, Kimiste në Institutin për Mjekësi Ligjore
Çfarë ndodhi?
Ministrja e Drejtësisë, Albulena Haxhiu, sot alarmoi për zhdukjen e mostrave të Astrit Deharit nga Instituti i Mjekësisë Ligjore.
Ministrja e Drejtësisë, Albulena Haxhiu ka bërë të ditur se qasje në vendin ku ruheshin epruvetat e rastit Dehari, kanë vetëm tre persona. Si rrjedhojë, ajo tha se mungojnë 12 epruveta me gjak, një e urinës dhe një e lukthit.
Për këtë çështje, ajo tha se i ka njoftuar prokurorinë e shtetit dhe policinë.
“Mbrëmë, në orët orët e vona, jam lajmëruar se janë zhdukur disa mostra nga laboratori i toksikologjisë, që funksionon në kuadër të Institutit të Mjekësisë Ligjore. Ky është një akt i rëndë e një akt kriminal. Për këtë arsye, mbrëmë i kanë njoftuar drejtorin e policisë dhe kryeprokurorin e shtetit. Neraksat-Mbajtëset e epruvetave kanë qenë 15 epruveta me gjak, një epruvetë e urinës dhe një e lukthit. Nga këto, instituti dy epruveta me gjak ia ka dhënë institutit zviceran. Sipas informacioneve, mungojnë 12 epruveta me gjak, një e urinës dhe një e lukthit. Në vendin ku ruhen epruvetat, kanë qasje vetëm tre persona”- ka thënë Haxhiu.
Ajo shtoi më tej se i di emrat e personave që kishin qasje në vendin ku ruheshin epruvetat.
“Unë i di emrat e personave që kanë qasje, por s’mund t’i them ata, sepse të njëjtit i dinë policia dhe prokuroria.”
Më tej, ministrja u shpreh që dyshon se kjo ka qenë e planifikuar, por se, megjithatë, “fjalën e fundit do ta thotë prokuroria.”
“Nuk jam eksperte që të tregoj se a e dëmton rastin apo jo, vetëm jam e thirrur të tregoj një gjendje faktike” – vazhdoi ajo.
Tutje, ministrja Haxhiu ka deklaruar se ky “akt i rëndë është vërejtur dje gjatë bartjes së mostrave nga frigoriferët e vjetër në ata të rinj”.
“Ne besojmë se ky akt i rëndë e kriminal, që ka ndodhur në ambientet që do të duhej të ishin të mbrojtura e të sigurta brenda IML-së, ka për qëllim ta dëmtojë edhe më tutje këtë proces dhe të na veshë neve me përgjegjësi. Ky akt i rëndë është vërejtur dje gjatë bartjes së mostrave nga frigoriferët e vjetër në ata të rinj. Situata e krijuar është tepër e rëndë. Të vendosë hije dyshimi në gjithë IML-në, por edhe në veprimtarinë e tij”- tha ajo.
